وئـــف عالدور...وستلئي وعدك يا بطل.

[أبو البيــس]

مرحبا جميعاً..

حابب اطرح مشكلة للنقاش بيني وبينكن.

يعني ما تطلع لبرا..خلوها أهلية بمحلية.

كم واحد فينا يوم الجمعة بيحمل حالو...وبيروح عالعباسيين
وبراسو موال انو يتفرج ويستمتع بلعب فريقنا الوحدة...
الي تعودنا السنت الماضية انو نشوفو لعب رهيب كتير..وباصات أرضية شي خيال
وهات وخود ولا أحلى.


ما حدا فهم عليي لسا شو بدي احكي:)

ما وصلت انا..لسا!

وازززززز....بس يوصل لساحة العباسيين الي منكوتة عالآخر وهلأ لبلشت ترجع شوي شوي.

بيتفاجئ بكتلة بشرية بتشبه خلية النحل..والدبابير وعش الزلائط و بخواش النمل...الي بيحفرو بالأرض.

وبيطلع عاليمين ..بيلاقي أخت هالخلية هنيك...وبعد شي 400 متر..كمان خلية تانية و تالتة و ....الخ

وبعد ما يضطر يروح ويتحول لحشرة وياخد بطاقة بسعر رمزي جداً...بيتوجه للحساب.

ايه...الحساب...ِبكن متفاجئين!

بيوقف على دور...فشر دور المخبز من 50 سنة.
و بنص الوقفة الطويلة ...الي ما عم نسمع فيها غير *** و **** و ***** ...يعني مسبات و عياط وحكي طالع نازل بلا طعمة...بتلاقي نص نصيص اجا وطحش عليك وقلك..باللهي بس أنا..
دبرني بمعيتك.

وهات يا وجع راس...رجال حفظ النظام عم يطرئو واحد طيارة...و بياع الكروت راكد ووراه واحد عم يقول وحيات تي تي عالبسكليتة عطيتك خمسمية وما عطيتني شي!

وفوضى!

طيب يا جماعة ....شلون بدنا نتساعد لنخلص من هالقضية؟؟؟

مافي طريقة انو الواحد يشتري تزكرتو من قبل بوقت؟

مافي طريقة انو نوصل صوتنا للمعنين...ونطلب منن انهن يفتحو كل الأبواب ؟

ما في شي طريقة تحلحل الأمور؟

انا متأكد انو الكبار المسؤولين ما بيهون عليهن هالحكي بنوب..
ولو عرفانين شو عم يعملوا هالصغار...رح يحاسبوهن!

لأنو منظرنا متل الخواريف عم نستنى لنتلآ وعدنا!

شو رأيكن بالموضوع دام فضلكن؟؟

[m@zen]

بالنسبة للتصويت طبعا لا http://smilies.sofrayt.com/fsc/nono.gif

بس هالمشكلة من زمان وماكانو يلاقولها حل الفتوته عالملعب بصعوبة والطلعة على أصعب

نتمنى انو يحلولنا هالمشكلة الدخول والخروج ومارح نطلب كراسي ولا ماشابه ذلك الناس عم تجيب معها سجادات و وغيرها وماشي الحال http://smilies.sofrayt.com/fsc/conversation.gif

[Ammar Alfarawati]

بايد كلام توتي

انو شوهي خاروف الواحد عم يفوت بارادته صح غالية

بس كلو دعم للنادي

[mohamad laban]

انشاء الله بسنه 2050 بتصير تفوت عالملعب بدون تدفيش :lol:

[عبيدة]

خواريف خسى عالأقل الخواريف بتقلهم زعررررررررر
بتلاقي الكبير احترم الصغير
بعدين صاحب الزريبة فاتحلهم بايبن ما باب واحد
مع احترامي الشديد للشباب وكلكم قدر
بس الفوضى عايشة بدمنا الله وكيلكم
لان هنن هيك بدهم وا>ا ما عملو هيك ما بيحتكروا سعر البطاقة
وبتلاقي واحد ب100 واحد50 وكل واحد ببيعك البطاقة حسب لهفتك وعجلتك هون المتعهد بيضرب ضربتوا
اما ا>ا كنا وا قفين باحترام ومفتوحة كل بواب الملعب
ومهما طال الدور مش رح يبقى اكتر من نص ساعة
اكيد رح يخسر المتعهد ويبيع البطاقة بسعر واحد
ما هيك.............ولا شو راي الشباب

[سعدي]

قصدك اخي عبيدة بتلاقي 10 عم يبيعوا ب 100 ليرة و واحد أو نص واحد عم يبيع ب 50 و غالبا ما بتلاقي ولا واحد ...
اما موضوع الخورفة .. فالكلمة مو كتير دقيقة ؟لأنو القصة مو هيك يمكن ما عاد استمتعنا متل السنة الماضية .. بس ما حدا ضربنا على ايدنا و قال انو روحوا ادفعوا 100 و شوفوا اللعبة ...

[syria alasad]

أخي القصة مو مشان الدفع

بس الجمهور بدو يتحمل اللعب الجامد وبرودة أو حرارة الطقس وغلاظة حفظ النظام
و ... و .... و كتير شغلات
بس بظن انو الروحة ع الملعب صارت ماشبة بدمنا وصرنا مدمنين عليها بغض النظر عن سعر البطاقة

بس بتمنى انو ما نضل واقفين نص ساعة ع الدور لحتى نفوت لأنو نحنا بشر من لحم ودم

حراااااااام

[أبو البيــس]

لك أهلين بالشباب الطيبة والله:):):)

أخي لا حدا يزعل مني عل ىسيرة الخواريف...يعني مزحة مو أكتر

أساسا مخورفين بكل شي هالأيام من الموبايل ...للبابوجة...يعني ماوقفت على فوتت لعبة:)

وبصراحة فوتت الملعب متل ما قالو الشباب ...صارت ماشية بدمنا..

وبيني وبينكن ها...ولاحدا يزعل ..انا ورفيقي أبو الروض..لما بدنا ننزل عاللعبة بقلو عبالك نزلة "شوينة" وهالحكي من شي سبع تمن سنين يعني:)

بس انا مجمل حديثي بيتعلق بـعملية الدخول القيصرية الي بيعملولنا ياها كل مرة..

وبالنهاية عم نروح بإرادتنا...بس حبينا ناخد آراء..ونحاول نغير بهالواقع المر شوي!

سامحونا...