المساعد الشخصي الرقمي

مشاهدة النسخة كاملة : عيب والله عيب

أبو رائد الوحداوي
10-20-2009, 03:30 PM
اول شي السلام عليكم
يعني ما بعرف شو بدو الواحد يحكي معقول في عالم عمتنتقد عمل المدرب والله هل القصة ما عم تفوت بمخي ولك الله يشهد من اربع سنين ما شفت نادي الوحدة عم يلعب طابة حلوة متل ما عيلعب هلق ولسه المدرب ما صرلو بالقصر غير مبارح العصر يعني بس بدي اسال يللي عم ينتقدو فريق اتحضر اخر فرق الدوري ولعب 3 مباريات خلال 11 يوم وجاب اربع نقاط ولعبة امية اول شي فريقنا لياقتودون الوسط ولعب لعبتين خلال 3 ايام وفريق امية مرتاح صرلو 10 ايام ولو اتوفقنا بالفرص لكان للمبارة كلام اخر يعني بيكفي انو عمنشوف فريق عم يلعب باص صح بيكفي انو عم نشوف صلاحية للاعب المرتاح انو يسدد عالكول بيكفي انو صار في احساس بكل فرصة انو الفريق قادر يوصل لمرمى الخصم ويسجل يعني والله ما بعرف مشان الله عطيني مبارة وحدة بمرحلة الذهاب الموسم الماضي طلع فيها الجمهور فرحان من قلب ورب متل ما صار بلعبة عفرين عطيني مبارة وحدة طلع فيها الجمهور خسران بس هو مقتنع انو فريقو قدم يللي عليه متل ما صار بلعبة المجد يعني والله انك تحب شخص وتحترمو فهل الشي حلو اما انك تكره وما تتصور حدى مكانو فهل شي بشع لا ومقرف كمان نادي الوحدة اكبر من الجميع وانا وقت شوف في حدى عميشتفل صح من حقي اني دافع عنو وياخوفي تشتفل العالم فيه من جوات النادي متل الاعبين ويصير فينا متل ما صار بالاتحاد الموسم الماضي يعني ضلو يشتغلو بتيتا لحتى طفشوه وجابو العفش وبعدين شو النتيجة انو طار الدوري من الاتحاد ونحنا اخدنا درس كبير وقت هل الشي صار معنا وقت الراحل نيناد بقى انا شايف انو هل المدرب عم يشتغل صح وبتمنى يللي بشاركني اخوكم ابو رائد
فراس لطفي
10-20-2009, 03:36 PM
و الله يا صديقي اذا أنت شايف فريق الوحدة بلعبة أمية كان جيد بتكون غلطان
لان الفريق كان سيء و مفكك الخطوط و بلا روح و بلا خطة
انا بعتذر من الجميع بس هاد رأي المتواضع
أبو رائد الوحداوي
10-20-2009, 03:41 PM
بس انا في شغلة حابب قولها السنة الماضية وقت خسرنا مع حطين بعد ما كنا متقدمين نزلت موضوع بعنوان لا اعذار لك يا نزار ووقتها الكل هاجمني وصار يقول انو الفريق ما تحضر منيح ومن هل الحكي وقت اتعادلنا مع المجد بعد ما كنا ربحانين 2 صفر كمان نزلت موضوع انتقدت فيه التبديل الاخير يللي كان السبب بالكول التاني كمان اتهاجمت وكل موضوع كان حدى ينتقد فيه عمل المدرب كان اما ان يغلق او يحذف فبتمنى انو كمان ما حدى ينزل موضيع تنتقد عمل المدرب وخلينا نحاسبو على الاقل بعد خمس او ست لعب وبعدين لكل حادث حديث وانا من جهتي اذا طار هل المدرب واجا المدرب يللي العالم عم تحفر مشانو فسدقو مارح ارحمو بالملعب وعلمو على كلامي وانا لا من جماعة الشومان ولا من جماعة الحكيم ولا من جماعة نزار انا من جماعة نادي الوحدة وهل شي وسام على صدري
عمادو
10-20-2009, 03:43 PM
والله رأيك المتواضع احتفظ فيه لنفسك

لأنو بالفعل الوحدة بلعبة أمية كان بيستاهل الفوز

لولا الفرص الكتيرة يلي راحت :crdr :crdr :crdr
فراس لطفي
10-20-2009, 03:44 PM
يعني لازم نستنى حتى يصير فريقنا في ذيل القائمة
حتى نغير المدرب ؟؟؟؟؟؟؟!!!!!!!!!
الوحدة يا عشق كل دمشقي
10-20-2009, 03:48 PM
لك يسلم هل التم يا كبير يا ملك أحلا أبو رائد وربي على خط كل الوحداوية ..لك وربي درر وسكر وعسل ولك فشية خلقي بهل الكلام الحلو يا أصيل أنت ..بس منشان الاخ فراس يلي اتفضل وعمقول انو المستوى الفريق مبارح كان مشتت ..الشوط الاول لا غبار عليه من اللعب اكتر من رائع ..بالشوط التاني انخفضت اللياقة للصفر عند اللعيبة فتابع المبارة منيح وحلل بشكل منطقي ..وربي وربي كنت بحبو للكابتن نزار ..بس من ورا بعض الناس ..رح اكرهو ..لك الفريق عميلعب بتكتيك وباصات وتفاهم تقول صرلن سنين عم يلعبو مع بعض ..لك فعلا من ايام نيناد ما شفنا هيك لعب ..لك كوستيكا يلي كنتو تنتقدو وطيرتو من رابع مبارة كان فهمان وبيسوا مية واحد من يلي عنا ..بس القط بحب خناقوو ..انشالله يارب يصير يلي بدكن ياه ويجي حبيب القلب ويستلم التدريب وتفوزو بالدوري ...بس طبعا قبل ما تجيب الدوري ..رح تجيك السكتة والجلطة والسكري والضغط من ورا اللعب ..(أبو شاكر رقم 2) فعلا عجبي على هيك عالم مستعدة تكره رجل منشان مصلحة رجل أخر
أبو رائد الوحداوي
10-20-2009, 03:49 PM
يعني لازم نستنى حتى يصير فريقنا في ذيل القائمة
حتى نغير المدرب ؟؟؟؟؟؟؟!!!!!!!!!
يعني والله ما بعرف شو بدي الك يعني صرلك بالمنتدى اربع سنين وما بجوز صرلك عشرين سنة قبل المنتدى بتشجع الوحدة معقول بين معك انو المدرب لازم يتغير والله شي غريب يعني يا انت غوارديولا يا انا حمار ما بفهم وشايف الوحدة عم يلعب طابة حلوة
الوحدة يا عشق كل دمشقي
10-20-2009, 03:52 PM
لك أخي اب رائد وحياتك بالملعب وقتها ..واذا انت مو من جماعة اي حدا ..فأنا مو من جماعة أي شخص سوري ..انا أردني بعشق الوحدة وبس من دون فلان ومن دون علان ..
الوحدة يا عشق كل دمشقي
10-20-2009, 03:54 PM
لك أذا بهاد اللعب ..انا مستعد ينزل الوحدة على الدرجة التانية المهم اني مبسوط باللعب ..مو ضروري انقهر وموت وانجلط حتى ناخد الدوري ..
أبو رائد الوحداوي
10-20-2009, 03:57 PM
يسعد مساك ابو رائد الورد أول شي كلنا مع المدرب اذا منيح بس اخطائه كتيرة ويا معلم نحنا لهلق مالعبنا الفرق القوية الكرامة الجيش الاتحاد الطلعية اذا من 3 مباريات 4 نقاط ومع مين المجد وعفرين وامية شو متوقع لبعدين وابو رائد العالم خايفة نركض ومانلحق وهي السنة عنا لاعبين كتير مناح بس ياخوفي السنة الجاية مايكونو موجودين ولله من حبنا للنادي محروق قلبنا ونحنا مالنا لا مع نزار ولا غيره نحنا مع نادي الوحدة وبس بس اذا كان الحل نزار انا اول واحد بوقف معه

يعني انت برايك انو اللعيبة يللي عنا هلا احسن من يللي كانو السنة الماضية يعني برايك الازهر والشعار والاباظة والعلايا ورافت والبشو والزبيدي وضيف الهون السيد والشوشرة والخراط والمعتوق وصخرة الدفاع باسافا يللي لولاه كنا اتبهدلنا بكذا لعبة وعارف الاغا وعلاء الشقران يللي بيلعب بنادي حوش بلاس تبع الاردن واراز ماكانو السنة الماضية خلينا نحكي حكي منطقي شه
فراس لطفي
10-20-2009, 04:00 PM
بتمنى نكون راقيين و حضاريين بالنقاش و لو اختلفنا بالرأي بس كلنا منحب الوحدة و بدنا يكون في المقدمة
و بتأمل يتحسن الفريق و يزداد تألق
و أن شاء الله هالمدرب يفهم و يستوعب دوري المحترفين السوري
أبو رائد الوحداوي
10-20-2009, 04:04 PM
بعدين السنة الماضية اول 3 لعب كانو اسهل وقتها خسرنا مع امية وربحنا شغل الله مع النواعير ولو الازهر وباسافا لتبهدلنا وصرح رئيس نادي النواعير انو طول الطريق والمحروس عم يقرا قرأن مشان ما يتبهدل وبعدين خسرنا مع حطين بعد ما كنا ربحانين وبعدين ربحنا شغل الله مع الطليعة لانو كانو بحالة يرثى لها خسرانين اربع لعب بالدوري وطالعين من دوري ابطال العرب ومع هيك كانو افضل منا وسجلنا كولين بالشوط الاول ونمنا كل المبارة وقال شو هي عملية اقتصاد باللياقة مشان الله لا تحيجونا للمقارنة بنوب وعن جد في عالم كتير رح تغضب بروحة هل المدرب وعلمو على كلامي انو لتلاقو العباسيين عم يصفر
الوحدة يا عشق كل دمشقي
10-20-2009, 04:06 PM
لك واللهي العظيم مافي مجال للمقارنة ..بين المستوى هاي السنة والمستوى هديك السنة ..والاخ يلي اتفضل وعمقول .أنو لو كانت هاي اللعيبة بأيدي نزار كان غير ..حبيبي بحب قلك لو كان نزار كون متأكد مارح يلعب غير بمهاجم و عشرة دفاع ..أصلا مين جبلنا الخالص عارف الاغا ومحمد منصور ..لسا لو مخلي عمر عاقل وكمال عاجي احسن منهم ..بعدين اللعيبة نفسها ما اتغير عليها شي ..غير المحترفين ..هديك السنة وقع مع علاء الشقران .لك لاعب وسط ونحنا عنا خمسين لاعب وسط وما عنا هجوم ..يعني مالنا عميان ولا حتى ما منفهم بالطابة ..وقع مع باسافا وكان عنا خمسين مدافع .بقى اكيد كان مارح يختار هل التشكيلة يلعب فيها ..بس خلص كأنو النادي هوة الكابتن نزار..لك ايييييييه الله يرحم ايام زمان لما راح الكابتن نزار على الجيش وقال رح أسحب جمهور الوحدة ..وكيف اتعبى الملعب حتى المضمار من جمهور الوحدة ..لأنو كان جمهور بحب الوحدة وبس وبس
الوحدة يا عشق كل دمشقي
10-20-2009, 04:10 PM
يلي عم يتفضل ويقول أنو قصي حبيب ظالمو المدرب ..حاجتكن منشان الله السنة الماضية قصي حبيب طول فترة الكابتن نزار ..كان لاعب عادي والكل بيعرف انه كان منخفض مستواه ..وكان اللعب لماهر وبس وكان قصي خلف ماهر باللعب ..
فراس لطفي
10-20-2009, 04:12 PM
هل يستحق هذا المدرب مبلغ ستة الاف دولادر شهريا
أبو رائد الوحداوي
10-20-2009, 04:16 PM
مافي وحداوي ما بيحب نزار بس والله الشغلة ذادت عن حدها يعني اذا هو بدو فريق جاهز ماديا ومعنويا وجمهور اخلاقي وبيقدر انو واتحاد كرة قدم على كيفو ومباريات ودية متل ما بيشتهي ومعسكر متل ما بيتمنى وهو ما دخلو بالامور الادارية وبدو اتنين تحت ايدو ومع هل الشي نحنا لازم ما نحاسبو عالنتائج ولا على طريقة لعبو لانو مين هل الحمار مني وجر يللي بيطلعلو ينتقد شخصو الكريم طيب اذا هو وحداوي عن حق وحقيق ليش مارشح حالو للانتخابات واستلم فريق كرة القدم بس هو بيخاف من الفشل لانو بخاف على اسمو واسمو اهم من النادي لانو اذا فشل كمدرب في ادارة يلزق التهمة بضهرها يعني الامور مكشوفة واذا لوي فكر يجيب نزار بحب زكرو لسه علام البزقة يللي بزقتها بوش نزار ما نشف وقت لعبة الوحدة والجيش 3*2 عزروني بس والله طاش حجري
أبو رائد الوحداوي
10-20-2009, 04:21 PM
متل مابدك ابو رائد مابدي فوت بنقاش وحدا يفهمني خطا الازهر والشعار والاباظة والعلايا ورافت والبشو والزبيدي تمام اول شي الخراط سلامتك والمعتوق كبر وحاجته من سنتين باسفا انا معك وعارف الاغا شو فادنا وحرام التعاقد معه والشقران مالعب كم مبارة واراز مهاجم بدي اسألك شو عمل ماهر السيد خسرنه اي بس انت مو شايف انو عنا 3 لاعبين محترفين كتير مناح وتوفقنا فيهم وهداف من الطراز الاول زياد شعبو ابو رائد فريقنا هي السنة كتير منيح وعنا لاعبين مناح يلي مجنني حراسنا ممتازين خط الدفاع منيح بس بدو مين يفهم ووسط بظن أقوى وسط بسوريا اذا استغلينه صح مهاجمين عندك تنين مناح الشعبو و المحترف المغربي اي شو ناقص يجي ميسي يلعب معنا هاد رأيي وبتمنى ماكون زعلت حدا

يستر عرضك مشان الله رفعتلي السكر والضغط بس على كلمة هداف من الطراز الاول مشان الله يعني برايك الشعبو صفقة الموسم مشان هيك شال الطابة وهي فايتة عالكول انا ما عم انتقد الشعبو وبتقع انو يرجع لمستواه ويسجل بظل طريقة اللعب المفتوح يللي عم يلعبها فريقنا بعدين مين يللي وقع مع الاغا ومين يللي وقع مع الشقران واراز ومين يللي خلانا ما نشوف لاعب اسمو قصي حبيب ما بعرف شو بدي قول خلص السكوت احسن
أبو رائد الوحداوي
10-20-2009, 04:25 PM
يلي عم يتفضل ويقول أنو قصي حبيب ظالمو المدرب ..حاجتكن منشان الله السنة الماضية قصي حبيب طول فترة الكابتن نزار ..كان لاعب عادي والكل بيعرف انه كان منخفض مستواه ..وكان اللعب لماهر وبس وكان قصي خلف ماهر باللعب ..
على فكرة ماهر ونزار من نفس الطينة مشان هيك ووالافو على بعض السنة الماضية
bashardo الوحداوي
10-20-2009, 04:31 PM
طولوا بالكم ياجماعة النقاش صار قوي كتير والشغلة بدها رواء
المدرب فاروق منيح بس الزلمة بدو شوية وقت لنشوف نتائج عمله واكتر من خبير كروي اكد هالشي ومروان عرفات منهم وكونوا على ثقة اذا بيترك فاروق الفريق مارح يجي نزار (يلي كلنا منحبو)واهم سبب بيقلك ياه انه لم يستلم الفريق من البداية وهي اللعيبة مو انا اخترتها ورح نرجع للمدربين يلي ماحدا بيحبهم كالشومان وغيرو وغيراتو
بقى يا حبايبي طولوا بالكم ولا تستعجلوا بالاحكام
فراس لطفي
10-20-2009, 04:52 PM
ليش ممنوع نحكي عن أخطاء المدرب بس بدكم نصفق للمدرب لان الشومان جابو
مو حرام مايكون عنا مدرب متل العالم و الناس
يعني معقول المدرب كل مباراة بتشكيلة
معقول بكون عنا نجم متل قصي حبيب و بيلعب أخر ربع ساعة
معقول لاعب ارتكاز بيلعبو هجوم و الهجوم دفاع و الوسط جناح
و جناح يمين بحطو جناح يسار
و قلب الدفاع بصير قلب هجوم
و الحارس وسط متقدم
يعني بدك نستنى حتى ينزل الفريق للدرجة التانية
wassim80
10-20-2009, 04:55 PM
مافي وحداوي ما بيحب نزار بس والله الشغلة ذادت عن حدها يعني اذا هو بدو فريق جاهز ماديا ومعنويا وجمهور اخلاقي وبيقدر انو واتحاد كرة قدم على كيفو ومباريات ودية متل ما بيشتهي ومعسكر متل ما بيتمنى وهو ما دخلو بالامور الادارية وبدو اتنين تحت ايدو ومع هل الشي نحنا لازم ما نحاسبو عالنتائج ولا على طريقة لعبو لانو مين هل الحمار مني وجر يللي بيطلعلو ينتقد شخصو الكريم طيب اذا هو وحداوي عن حق وحقيق ليش مارشح حالو للانتخابات واستلم فريق كرة القدم بس هو بيخاف من الفشل لانو بخاف على اسمو واسمو اهم من النادي لانو اذا فشل كمدرب في ادارة يلزق التهمة بضهرها يعني الامور مكشوفة واذا لوي فكر يجيب نزار بحب زكرو لسه علام البزقة يللي بزقتها بوش نزار ما نشف وقت لعبة الوحدة والجيش 3*2 عزروني بس والله طاش حجري

طول بالك خيو ؟ شو انت بدك تشعللها ولانتناقش بهداوة
يعني رأيي مع احترامي ليلي قلتو (أنو ابوحامد بيسوى 100كولوفتش وشئفة) بس هاد مابيعني أني بدي ياه هلئ يستلم الفريق
المشكلة الفاس وئعت بالراس وهاااد مدرب فريقنا ولازم نتحملو //// لك والله دوري بلدنا بأشباه لاعبين وكمشة تكتيك وشوية دعم من الجماعة فوق///// بينحط بالجيبة الزغيرة لهيط مطولين بالنا وفهمونا بئى عمننقد لأننا مو مقتنعين بهالمدرب مو لأنو بدنا نزاااااااااااااااااااااااااار فهمونا كرمال سيدنا محمد...
f.torres
10-20-2009, 05:08 PM
تفاءلوا بالخير تجدوه
<MoHaMeD DaBoUL>
10-20-2009, 05:26 PM
بازن الله المدرب رح يصحح كل اخطائو
والجمهور كلو يصير معو ..
omarjeroudi
10-20-2009, 05:45 PM
كلامك أخي أبو رائد سليم 100%100 و بينحط على العين و الراس و الله فشيتلي خلقي لسا نازلين بدون يمين بيستاهل 10000 $ قليل عليه بكفي صرنا نشزف طابة عم تتحرك موشلف تربح
noel
10-20-2009, 06:05 PM
كسبو الصلاة ع النبي شباب
اول شي الطرفين معوكن حق يعني لمدرب الجديد منيح بس بنفس الوقت عم يرتكب اخطاء
خلينا نعتبر هل 4 مباريات من الدوري دورة تدريبية و تجريبية و توقف الدوري لصالحنا بعد التوفق بدوب التلج و بيبان المرج
انا لا بهمني نزار و لا بهمني فاروق بهمني مدرب يعطي لفريق و يحطو ع السكة الصح
بس بحيادية
اسلوب هل مدرب باللعب حلو يعني في نفس هجومي ولعبو مو تجاري للنقط بس بعتقد قلال لمدربين يلي بدورينا بيلعبو هيك
و كمان بحيادية في اخطاء عم يعملها المدرب لازم انو يتداركها سببها جهلو بطريقة لعب الدوري السوري و باللاعبين و قلة افترة التدريبية
و ما بننسى انو ادارتنا الجديدة حطت ماهر مصطفى و اكيد ماهر رح يعطي المدرب نقاط يلي ما بيعرفها و بالتوفيق لنادينا خلينا ايد وحدة ما بنندم اكيد
taiger
10-20-2009, 06:30 PM
لازم نصبر على المدرب يا شباب غلط نحكم عليه من هلق بعدين يا عمي مع احترامي لكل المدربين تركونا من نزار ومن غيرو وخلونا بلي عنا يعني لو راح هاد المدرب مين لح يجي يلي عندو بديل يجيبو لنشوف
Radwan
10-20-2009, 06:55 PM
المدرب الحالي السيد / فاروق حسب المباريات التي لعبها الفريق ومدة التحضير ومستوى التكتيك فيها جيد والدليل أن فريقنا كان يهدر العديد من الفرص في كل مبارياته وهذه مشكلة ليست بالتكتيك أو المدرب إنما باللاعبين وحسب متابعتي الطويلة ، أرى أن المدرب الأجنبي هو الأصلح لقيادة الفريق قدم أو سلة حتى لانظلم أبناء النادي وننتهي من القيل والقال ووجع الرأس والتكتلات .

أنا متفائل بالمدرب وأتمنى له التوفيق وأن ينال الدعم من الجميع إدارة وجمهور ويكون الخليفة للراحل نيناد .
محمد حجون
10-20-2009, 07:13 PM
والله يا ابو رائد كلام درروجواهر

يا شباب طول بالكم والله القصة بس بدها تطويل بال
شوفو الفرق برا
هي ريال مدريد وكل المصاري يلا حطا وخسر مع اشبيليا

ورخم من هيك جمهورو لما خلصة المبارة زفقلوووو
يعني ما في مدرب بيمسك العصا السحرية
وبيوم وليلة بيصير فرقنااااااااااا

يعني فكرو اذا راح المدرب شو لح يصير فينا ومين بدو يستلم وحتى يجيبو مدرب وياخد على الفريق


الله يستر ما ننزل على التانية

مشان الله هدو شوي وصلو على النبي
فريقنا منيح كتير وفي تحسن بنقل الطابة و اللعب
بس مشكلتنا هي صايرة بخط الدفاع
وانشالله متما حلينها وسدينا هي الثغرة امورنا بتصير تمام تمام
شنكل
10-20-2009, 07:33 PM
ابو رائد كلامك منطقي وانا مقتنع في مية بلمية
نحنا منختلف ولكن كلنا منجتمع بحب الوحدة
khaled666
10-20-2009, 07:47 PM
يسلم تمك يا أبو رائد الوحداوي ... انا والله حبيتك من كلامك من دون ما اعرفك
المصيبة يا أبو رائد شكلو هالمنتدى عم يندار من قبل ناس غير كفؤة .... وللأسف بدل ما يعطونا معلومات عن النادي وعن اللاعبين ويقومو باغناء هالمنتدى بمواضيع شيقة تفيد القارئ وتزيد عدد المحبين اله ... وتساعد على تثقيف وتنوير القلة الغير مثقفة .. للأسف المشرفين نفسهم عم يساعدو على الشللية وعم يحفزو الناس على الغضب
وبس توقع الفاس بالراس متل كل سنة بيصير بدهم سلتنا بلا عنب
انا معك بكلامك 100% لازم نصبر على المدرب ونشوف ... احسن ما نندم
وبعدين مين قال ان هيك فريق رح يربح الدوري الكل قال انو لازم نصبر ... حتى ابو عمر الغالي
ياجماعة حذفو تعليقي لأني انتقدت احد المشرفين لأنو كان عم يسب اللاعبين و يقول عنهم عاهات
بها المنتدى يا بتمشي ع كيفهم يا اما بيمسحو فينا الأرض
انا كتير بحب نزار بس هو تركنا بعز الموسم السنة الماضية ...!! ومو مشكلة انا لسا بعشق نزار
بس والله حرام اللي عم يعملو بماهر بعد كل هالتضحيات
فغلا عيب ... والله عيب
و مشكور يا ابو رائد .... يا فهمان
سمير الوحداوي
10-20-2009, 08:01 PM
هل يستحق هذا المدرب مبلغ ستة الاف دولادر شهريا

مشكلجي وبتحب الفتيشات!!!!!!!!!!!!!!!!!!!!!!!!!!!!!!!!!
على علمي 4000 دولار راتب المدرب
الوسيم
10-20-2009, 08:06 PM
أول شي السلام عليكم :أنا مع الأخ أبورائد وبضم صوتي لصوته
انا لست من المشجعين القدامى للوحدة لذا أعتبر رأي محايدا
المدرب ممتااااااااااااااااااااااااز ومن الطراز الرفيع الوحدة عمرو ما لعب هيك ومتعنا
وكونوا متأكدين اللاعبين بس ياخدو على بعض أكتر رح تشوفوا فريق ممتاز لن يستطيع أحد منافسته وبكرة بذكركن
ramyamer
10-20-2009, 08:20 PM
المدرب الحالي السيد / فاروق حسب المباريات التي لعبها الفريق ومدة التحضير ومستوى التكتيك فيها جيد والدليل أن فريقنا كان يهدر العديد من الفرص في كل مبارياته وهذه مشكلة ليست بالتكتيك أو المدرب إنما باللاعبين وحسب متابعتي الطويلة ، أرى أن المدرب الأجنبي هو الأصلح لقيادة الفريق قدم أو سلة حتى لانظلم أبناء النادي وننتهي من القيل والقال ووجع الرأس والتكتلات .

أنا متفائل بالمدرب وأتمنى له التوفيق وأن ينال الدعم من الجميع إدارة وجمهور ويكون الخليفة للراحل نيناد .
هادا الحكي يلي عليه علامات.....
والله فشيتلي خلئي يل ابو رائد بس للاسف ....ما بدي احكي
THE DARK MAN
10-20-2009, 08:26 PM
ابو رائد معو حق
وياريت انو نصبر على المدرب شوية لانو ازا بتتزكرو نيناد الله يرحمو اول ما استلم الفريق تعب شوي بعدين شفتوا شو عمل
وتقبلوا مروري
أبو رائد الوحداوي
10-20-2009, 08:44 PM
المدرب الحالي السيد / فاروق حسب المباريات التي لعبها الفريق ومدة التحضير ومستوى التكتيك فيها جيد والدليل أن فريقنا كان يهدر العديد من الفرص في كل مبارياته وهذه مشكلة ليست بالتكتيك أو المدرب إنما باللاعبين وحسب متابعتي الطويلة ، أرى أن المدرب الأجنبي هو الأصلح لقيادة الفريق قدم أو سلة حتى لانظلم أبناء النادي وننتهي من القيل والقال ووجع الرأس والتكتلات .

أنا متفائل بالمدرب وأتمنى له التوفيق وأن ينال الدعم من الجميع إدارة وجمهور ويكون الخليفة للراحل نيناد .
كبير والله كبير عمي ابو اسماعيل خلص وصلني حقي الله يديمك يارب
ramyamer
10-20-2009, 08:51 PM
ابو رائد شو سويت ابو رائد
محمد ايهاب البوارشي
10-20-2009, 09:09 PM
اول شي السلام عليكم
يعني ما بعرف شو بدو الواحد يحكي معقول في عالم عمتنتقد عمل المدرب والله هل القصة ما عم تفوت بمخي ولك الله يشهد من اربع سنين ما شفت نادي الوحدة عم يلعب طابة حلوة متل ما عيلعب هلق ولسه المدرب ما صرلو بالقصر غير مبارح العصر يعني بس بدي اسال يللي عم ينتقدو فريق اتحضر اخر فرق الدوري ولعب 3 مباريات خلال 11 يوم وجاب اربع نقاط ولعبة امية اول شي فريقنا لياقتودون الوسط ولعب لعبتين خلال 3 ايام وفريق امية مرتاح صرلو 10 ايام ولو اتوفقنا بالفرص لكان للمبارة كلام اخر يعني بيكفي انو عمنشوف فريق عم يلعب باص صح بيكفي انو عم نشوف صلاحية للاعب المرتاح انو يسدد عالكول بيكفي انو صار في احساس بكل فرصة انو الفريق قادر يوصل لمرمى الخصم ويسجل يعني والله ما بعرف مشان الله عطيني مبارة وحدة بمرحلة الذهاب الموسم الماضي طلع فيها الجمهور فرحان من قلب ورب متل ما صار بلعبة عفرين عطيني مبارة وحدة طلع فيها الجمهور خسران بس هو مقتنع انو فريقو قدم يللي عليه متل ما صار بلعبة المجد يعني والله انك تحب شخص وتحترمو فهل الشي حلو اما انك تكره وما تتصور حدى مكانو فهل شي بشع لا ومقرف كمان نادي الوحدة اكبر من الجميع وانا وقت شوف في حدى عميشتفل صح من حقي اني دافع عنو وياخوفي تشتفل العالم فيه من جوات النادي متل الاعبين ويصير فينا متل ما صار بالاتحاد الموسم الماضي يعني ضلو يشتغلو بتيتا لحتى طفشوه وجابو العفش وبعدين شو النتيجة انو طار الدوري من الاتحاد ونحنا اخدنا درس كبير وقت هل الشي صار معنا وقت الراحل نيناد بقى انا شايف انو هل المدرب عم يشتغل صح وبتمنى يللي بشاركني اخوكم ابو رائد
بسم الله الرحمن الرحيم
الله يعطيك العافيه أخي ابورائد كلامك صحيح 100%
ياجماعه أقرأوا المباراة صح قبل ماتحكموا والمنطق والعقل بيقول لس بكييييييييييييييييير نحكم على حدا سواء اللاعبين والمدرب؟؟؟؟؟؟؟؟؟؟؟؟؟؟؟؟؟؟
أغيد الفرا
10-20-2009, 09:13 PM
لك لسا بكير على الحكي عن المدرب !
أب عمر العرقسوسي
10-20-2009, 09:19 PM
شو شباب ورقو
هي اليوم خسر البارسا شو صار
معقول مع كل خسارة بيبدلو المدرب؟؟؟
ممكن
SH@@MI
10-20-2009, 09:20 PM
بغض النظر عن باقي المنتقدين

أنا لما انتقد بعض أخطاء المدرب

ما بنتقدها لأني بتمنى يروح ويستلم شخص تاني

وما عم فكر بأي شخص يستلم التدريب

أنا عم احكي على أمل تتصحح هالأخطاء

وبالعكس أنا من المؤمنين بأنو كل ما ثبت المدرب أكتر
كل ما جاب نتائج أحسن

يعني لو كان المدرب سيء بس هو متعرف عالنادي وبيعرف كل شي
أحسن من مدرب يجي لسا مو عرفان شي

وكمان بشكل عام المدرب الأجنبي بريحنا من الشللية


بس ليش لهلأ ما لعب عبد الناصر

في كتير اشارات استفهام

بس منأجلها لبعد لعبة جبلة
لأنو في توقف للدوري

عسى تتصحح هالأخطاء
جوري
10-20-2009, 09:23 PM
أفضل إنطلاقة من أربع مواسم
و أربع نقط من 3 مباريات هي أفضل شي من 4 مواسم
والمدرب في عندو نفس هجومي ممتع
عندو شوية أخطاء أكيد رح يتلافاها و حلو النقد بس موحلو التسرع بالأحكام و لعبان 3 مباريات خسران وحدة ومتعادل وحدة وفايز وحدة بدك تقيل مدرب هاد مو كلام عقل للأسف هاد ردة فعل مالها مبرر
مشان هيك ياريت نترك الزلمة يعرف يشتغل على الفريق ويلعبها صح فكرمال الله هدو شوي
فراس لطفي
10-21-2009, 06:22 AM
انا لست مع اقالة المدرب في هذة المرحلة و يجب منحه فرصة
لكن يجب عليه ان يعترف بأخطائة و أن يصحح هذه الاخطاء و لا يكون عنيد
و الاعتراف بالخطأ فضيلة
ميت على قيد الحياة
10-21-2009, 01:35 PM
لك حاجة مشان الله ....لسى راكدين ورا المدرب لابدنا ابن النادي ولاغيرو واتذكروا السنة الماضية كتير منيح بكرا اذا رجع منبلش نفس المسلسل بيشتغلو في نادي الوحدة غير مدرب اجنبي مابيمشي حالو ..........عاشق نيناد
أبو الياس
10-21-2009, 01:51 PM
هل يستحق هذا المدرب مبلغ ستة الاف دولادر شهريا

محمد جمعة كان ياخد قديش؟
أيمن حكيم كان ياخد قديش؟
نزار محروس كان ياخد قديش
عساف خليفة؟
كوستيكا؟
فريقها كلها من 500 ل 1000 دولار وهاد الشي مقبول لأنو المدرب أجنبي مو محلي

وأنا مع أب رائد بكل كلمة حكاها ومع المدرب حتى نهاية الذهاب

ويلي عامل حالو موضوعي وحيادي يستنى متل ما استنى على المحروس السنة الماضية وبعدين يقارن
Anas70
10-21-2009, 02:14 PM
ولله كلامك جميل وأنا معك بهذا الكلام ياأحلى ابورائد
f.torres
10-21-2009, 02:55 PM
يلي مو عاجبو المدرب أحسن لايجي على الملعب .
wissam82
10-21-2009, 09:42 PM
أخي أب رائد الغالي
والله الموضوع مو متل ما عم تفكر الله وكيلك
وحكينا هاد بس خوف ع النادي والفريق وما في ببالنا شي تاني ..

يعني عم نحكي على أمل تصحح الأخطاء

واذا ما تصححت رح تشوف النتائج بعينك مع الأيام
ويا سيدي إن شاء الله يطلع كلامنا خطأ ,, والله منفرح
لان بالنهاية يلي بهمنا مصلحة الفريق وبس ..


وبس بدي أكدلك انه عناصر فريقنا هالموسم أحسن بكتيررررررر
من الموسم الماضي وعنا المحترفين التنين سي الشيخ ومارك لحالهم
بزيدوا قوة فريقنا عن الموسم الماضي بنسبة كبيرة كتير ..
وحداوي لصاجة
10-21-2009, 10:53 PM
يوالله ياشباب نادي الوحدة عم يلعب احلى لعب بالفرق السورية كلها بس الحظ ماعم يوقف معنا يعني وقت خسرنا مع المجد كان اللعب بالشوط الاول ممتاز وبشوط التاني ماكانو مناح لانو التحضير كان ضعيف وبلعبة عفرين اللعب كلو للوحدة واسحقينا الفوز وبلعبةاميةلو كان عنا شوية حظ لكنافزنا ورحنا مع نزار خسرنا واداء زفت ونزار جاب بلاوي لعيبة وكان تحضيرو احسن بعدين يااخي نزار تركنا ورااح ؟؟؟
بقا على شو بدنا نرجعو ..
ابو مأمون الوحداوي
10-21-2009, 11:50 PM
كرمال أبو رائد دشرووووو
احمد بيرقدار
10-22-2009, 03:50 AM
يسلم هالتم يا احلى ابو رائد

لا لا يا زياد
أبو رائد الوحداوي
10-22-2009, 05:32 AM
كرمال أبو رائد دشرووووو
احلى اب مأمون الورد ع روسي حورتك ياطيب بس يستر اختك بلا ما يعفطونا
أبو رائد الوحداوي
10-22-2009, 05:34 AM
يسلم هالتم يا احلى ابو رائد

لا لا يا زياد
احلى اب عمر الغالي كمان انت عراسي التل وكزينوهاتها لاجلك
ولا لا يازياد الله **** الاغا يللي وصلنا لهون
أبو رائد الوحداوي
10-22-2009, 05:45 AM
أخي أب رائد الغالي
والله الموضوع مو متل ما عم تفكر الله وكيلك
وحكينا هاد بس خوف ع النادي والفريق وما في ببالنا شي تاني ..

يعني عم نحكي على أمل تصحح الأخطاء

واذا ما تصححت رح تشوف النتائج بعينك مع الأيام
ويا سيدي إن شاء الله يطلع كلامنا خطأ ,, والله منفرح
لان بالنهاية يلي بهمنا مصلحة الفريق وبس ..


وبس بدي أكدلك انه عناصر فريقنا هالموسم أحسن بكتيررررررر
من الموسم الماضي وعنا المحترفين التنين سي الشيخ ومارك لحالهم
بزيدوا قوة فريقنا عن الموسم الماضي بنسبة كبيرة كتير ..
اخي ابو انس انا يللي قاهرني انو الكل صار يفهم بالفطبول على زمن هل المدرب ليش السنة الماضية وقت تبهدلنا مع كل الفرق بالذهاب وانا على كلامي يعني مافي فريق لعبنا معو الا ماكان هو الطرف الافضل الا بمبارة الشرطة لانو استسلم من اول عشر دقائق بسبب الجولين والطريقة يللي كنا نلعب فيها الله يشهد استحا نادي تحويشة الطبالة يلعب فيها ومع هيك كان على طول يلتقا اعذار بعدين انا معك انو سي الشيخ ومارك هنن محترفين على مستوى عالي بس كمان السنة الماضية كان عنا ماهر السيد وياسر شوشرة وعلاء الشقران وباسافا والاغا على كل حال بتمنى لوفي عندك شرطان للمباريات السنة الماضية انك تتفرج عليهون وتعمل مقارنة بسيطة انا المدرب لا بيقربني ولا بينسبني بس الحق يقال انو عندو شي يعطيه للفريق والله يوفقه يارب
ضياء الدين
10-22-2009, 05:46 AM
مشكور أحلى أبو رائد الورد :f):f):f)
أنا معك بكل حرف نطقت فيه
لسه ما ظهرت سيئات وحسنات هل المدرب صار الحق عليه
يعني اللاعبين هنن الخارقين الحارقين المبيدين
بعدين والله بتعجب من شخص بقلك التبديل الفلاني كان غلط الأفضل يكون هيك وعلى أساسه بيحكم أنو المدرب لازم يطير
ليش دخلكون الكابتن نزار محروس (وأنا من أشد المحبين له ) ما غلط السنة الماضية
ولا الكابتن نزار ملاك والباقي ما بيفهمو
النقطة الأخيرة :
في فكرة سائدة عند الشباب أنو إذا بيجي المحروس بيشيل الزير من البير وبخلي الوحدة بالصدارة ما بعرف حاسس هل الفكرة مو ظابطة بنوب
DIABO MAN
10-22-2009, 05:56 AM
لك والله حرام مدرب عم يلعب بفريق مو محضر لسه بكير عليه
أبو رائد الوحداوي
10-22-2009, 06:10 AM
شباب بتمنى ماحدا يزعل مني انا بحبو للكايتن نزار والدليل اني حاطط صورته بملفي الشخصي من اول ما سجلت بالمنتدى وهو رمز كبير لكل وحداوي وفي النا كتير زكريات حلوة معو متل كاس الجمهورية والجول التاريخي على جطين بس كمان ما بنسى وقت راح عالجيش وصرح انو جمهور الوحدة رح يلحقو وما بنسى كيف تركنا السنة الماضية انا وقت دربنا بمرحلة الذهاب ما اقتنعت بولا عذر لانو في مدربين عم يشتغلو بوضع اكتر ما ساوي من وضعنا وعم ينجحو متل محمد ختام مع امية والخانكان مع الجيش يللي ما لعب بفريق من الشباب ومع هيك نجحو وما كنا نسمع التذمر منهون وانا والله شايف انو هل المدرب عم يشتغل ومن لا يعمل لا يخطا وتزكرو اول موسم استلم فيه نيناد اديش حاربو الجمهور وكلو لانو كان خليفة نزار والدليل انو جبنا مركز رابع وغالبية المباريات يللي ربجناها كانت خارج ارضنا وانكتب كتير بالصحف انو الوحدة خارج ارضو افضل بكتير من على ارضو والسبب ضغط الجمهور بقى الشغلة بدها شوية صبر وبرجع باكد انو الحل الافضل هو المدرب الاجنبي لانو ما بهمو غير انو يشتغل لاسمو وهل شي بالنهاية اكيد لمصلحة النادي
صقر قريش
10-22-2009, 07:26 AM
[quote=أبو رائد الوحداوي;443388]بس انا في شغلة حابب قولها السنة الماضية وقت خسرنا مع حطين بعد ما كنا متقدمين نزلت موضوع بعنوان لا اعذار لك يا نزار ووقتها الكل هاجمني وصار يقول انو الفريق ما تحضر منيح ومن هل الحكي وقت اتعادلنا مع المجد بعد ما كنا ربحانين 2 صفر كمان نزلت موضوع انتقدت فيه التبديل الاخير يللي كان السبب بالكول التاني كمان اتهاجمت وكل موضوع كان حدى ينتقد فيه عمل المدرب كان اما ان يغلق او يحذف فبتمنى انو كمان ما حدى ينزل موضيع تنتقد عمل المدرب وخلينا نحاسبو على الاقل بعد خمس او ست لعب وبعدين لكل حادث حديث وانا من جهتي اذا طار هل المدرب واجا المدرب يللي العالم عم تحفر مشانو فسدقو مارح ارحمو بالملعب وعلمو على كلامي وانا لا من جماعة الشومان ولا من جماعة الحكيم ولا من جماعة نزار انا من جماعة نادي الوحدة وهل شي وسام على صدري:)):)):)):)):)):)):)):))
حلوا عن المدرب الجديد
وتذكرواانو حتى نيناد اخد فرصتوا لحتى عمل يلي ما
ما قدر ابن النادي يلي ثبت اخلاصه
بورقة استقالته السنة الماضية ماعملوا
وبراهنك ما لح يقدر يعملوا لو جبتولوا ميسي واب خليل سوا
أميرالشام
10-22-2009, 12:53 PM
الله يعطيهون العافية
أبو جورج الوحداوي
10-22-2009, 03:22 PM
المدرب لازم ياخذ فرصتوا كاملة و بعدها منحكم

لعبة أمية ما أقتنعت بالفريق و بيلي صار بالملعب

بس بصراحة في أعذار و أولها ضعف الأستعداد و ضغط المباريات و ضعف اللياقة

بس بتمنى من الكل يطولوا بالون شوي

السنة الماضية ابو حامد استلم لافريق 4 شهور و لاقينالو 100000 عذر

خلونا نطول بالنا شوي هلق و لسه معنا شهر راحة بعد لعبة جبلة

و تذكروا انو الظروف يلي توفرت مع ابو حامد افضل من ظروف المدرب فاروق

بكل الاحوال احنا مع الوحدة بغض النظر عن الأسماء
Saleh Al Kurdi
10-22-2009, 05:06 PM
الكوتش فارووق ممتاز وهو يحتاج ل١٠ لعب حتى يكتشف امكانيات لاعبيه
وجماعة المذكور في النص يحاربون كل من قد ينجح وللتذكرة فهم من قد حارب نيناد في بداياته وحتى ايام نجاحه بحجة الفريق الشاب رغم ان نيناد اول من طالب بقصي وعمل على ترفيع شقالو واعطى فرصة للزبيدي وصنع من معتصم لاعبا في ذلك الوقت ولو طلب منه صناعة فريق دون٢٠ سنة لفعل فهو مدرب محترف يقوم بما يطلب منه
Nassib kabbani
10-22-2009, 05:20 PM
كلام حلو وهاد يلي بقلبي مية بالمية وانا كمان ما رح ارحم حدا