الحلقة (2) من لمسة وفا ... مع النجم السابق رشدي الحلبي

[wahdawia.net]

رشدي الحلبي ( أبو العلا )

http://up106.arabsh.com/s/jfgowmfw3d.jpg (http://up106.arabsh.com/)

نجم من نجوم نادي الوحدة السابقين الذي قدم الكثير لنادي الوحدة وقضى عمره الكروي
كله في النادي في جميع الفئات العمرية ثمانية عشرة عاما قضاها أبو العلا في النادي
بكل إخلاص ووفاء ومحبة للقميص البرتقالي
بدأ مع الأشبال عام 1983 وودع الملاعب في عام 2001

http://up106.arabsh.com/s/e7ap0fgf74.jpg (http://up106.arabsh.com/)


http://up106.arabsh.com/s/w89vdhteym.jpg (http://up106.arabsh.com/)
صورة من مباراة نهائي الكأس عام 93 الذي احرزه ابو العلا مع المجموعة


http://up106.arabsh.com/s/0ywu5utq7r.jpg (http://up106.arabsh.com/)



أبو العلا حل ضيفا على منتدى الوحداوية في حوار خاص معه نتمنى أن ينال إعجابكم

http://up106.arabsh.com/s/wizsz5mukx.jpg (http://up106.arabsh.com/)


حاوره : أحمد بيرقدار

[wahdawia.net]

رشدي الحلبي برحب فيك بإسم أعضاء مندى الوحداوية بشكل خاص
وبإسم جماهير النادي بشكل عام
أهلا وسهلا فيكم وشكرا لمنتدى الوحداوية على هذه اللفتة الجميلة
في سؤاله عن اللاعبين القدامى أبناء الجيل السابق
أبو العلا أول شي احكيلنا عن بدايتك
بدايتي كانت عام 83 في أشبال نادي الوحدة مع الكابتن نبيل الفحل وكنا مجموعة حلوة وبعدين أنتقلت للناشئين مع الكابتن هيثم المالح ومن ثم بفريق الشباب مع الكابتن عيد بيرقدار ومن ثم مع المدرب عماد شومان ومن ثم أنتقلت إلى الرجال وكان حينها المدرب خليل إبراهيم الذي كان له فضل كبير علي وهو يلي مشاني بمركزي الوسط المتأخر وبعدها دربنا الكابتن أحمد عليان ومن ثم الكابتن نزار محروس والكابتن أيمن الحكيم والكابتن موسى شماس وآخر شي وقت أعتزالي كنت مع الكابتن نزار محروس
إنجازاتك مع الفريق
كأس الجمهورية عام 1993 وكأس القائد العام للجيش والقوات المسلحة بنفس العام
أجمل مباراة لعبتها في حياتك
مع الاتحاد في حلب يلي فزنا فيها 1-0 وسجله محمود محملجي بالدقيقة 15
وكان نجم المباراة يومها محمود محملجي
لأي عام بقيت في الملاعب ومع من كانت مباراة الاعتزال
لعام 2001 ومباراة أعتزالي كانت مع نادي حطين
ولمين أعطيت قميصك بوقتها
لللاعب جمال ياسين يلي ترك الملاعب مبكرا
أحلى ذكرياتك بنادي الوحدة
أحلى ذكرى طبعا إحراز كأس الجمهورية وطبعا كان في ذكريات جميلة جدا بالسفر بالمعسكرات أيام لاتنسى كنا أكثر من أخوة محمود محملجي الزعتري عساف أسعد زحاليق سامي جمعة هادا من الشباب الخلوقة الطيبة وأحمد شربجي الله يرحم ترابو هادا يلي الجمهور ما بينساه ويلي بتمنى أنا أنو يتخصص إلو حلقة بالمنتدى لأنو فعلا كان من رجال النادي يعني ممكن أنا ساعدكون أو حدا من أخواته يعني لازم انو يتخصص حلقة عن المرحوم الشربجي
ابو العلا بعد الاعتزال انت عملت في تدريب القواعد شو بتحكيلنا عن هذه التجربة
عملت ثلاث سنوات في تدريب القواعد بالنادي أول سنة بالشباب مع المدرب خليل ابراهيم ومن ثم جاء الكابتن بشار شريف وبعدها عملت موسمين مع الكابتن محمد القادري سنة بالأشبال وسنة بالناشئين وحققنا أول مجموعتنا مع الأشبال ومع الناشئين وأنا بفتخر بصراحة بالعمل مع القادري بالتدريب لأنو من أفضل المدربين القواعد بسوريا وأنا استفدت كتير من العمل معو وأخدت خبرة التدريب منو
وحاليا شو سبب ابتعادك عن التدريب بالنادي
السب أنو بالفترة الأخيرة ما عاد قبضنا رواتبنا بقيت آخر شي سبع شهور ما قبضت معاشي فيهون يعني صرنا نشتغل آخر شي مجانا بدون رواتب ويوعدوني يوعدوني وما يعطوني فقلتلهم أنا بهيك وضع لا أستطيع أن اكمل مع الفريق انا زلمة بدي روح شوف شغلي شو بدي اشحد شحادة رواتبي ولهلأ معي الكرت يلي إلي فيه مع النادي اجار السبع شهورمن أيام الأستاذ خالد حبوباتي يلي لهي اللحظة ما قبضتهون
بما أنك دربت بقواعد النادي ليش ما عم نشوف قواعد بنادي الوحدة
السبب أنو ما في اهتمام ابدا يعني ما في اداري عم يدعمون أو يعطيهون مصاري مثلا طلبنا بيجامات بقينا ست شهور لعطوهم البيجامات مفروض هدول يكون الاهتمام فيهون أكثر من الرجال هادا لاعب الأشبال والناشئين بدو أهتمام بدو عناية مثلا حققنا مركز أول على مجموعتنا ما حدا اجا حمسهون أو عطاهم مكافأت أو مصاري أو بيجامات أنا كمدرب للقواعد سبع شهور ما عم أقبض رواتبي أنا ما بيهمني المصاري بس يكون الواحد إلو قدر وقيمة أنا بقيت 3 سنين بالقواعد كانوا اللاعبين أعزمن أخواتي هدول الصغار كنت عاملهم كأخواتي انا تركت النادي بشهر التاني 2008 ولحد الآن اللاعبين بيجوا لعندي وبيسلموا علي لأني وقت كنت اداري كنت اخ الهم الاداري لازم يعرف قلوب اللاعبين شو فيهم مو الاداري يلي بدو يجي يطقطق براغي ويطلع على كتاف الناس يعني كلو راكض على المظاهر ما حدا عم يسأل على القواعد مثلا السنة الماضية قالوا الإدارة بدنا نطرد كل مدرب ما عم يقدم شي وقالوا باجتماعون انو لازم كل واحد يقدم ليستة بشو أشتغل وشو عمل من وقت ما أستلم كتحضير فريق كنتائج وبعدين هادا وش الضيف ما عاد حدا سأل في مدرب كان عندو مجموعة حلوة كتير لازم ياخد فيها بطولة الدوري خسر كل مبارياته وما حدا حاسبه وما حدا قلو شي يعني بس عم يهتموا بالفريق الأول والباقي ما حدا عم يهتم فيه
كان عندك مواهب من اللاعبين يلي دربتهم
في لاعبين جيدين جدا بس لازمهم شوية عناية متل أسامة أومري- سعيد نور الدين - ياسر شامية وفي من فريق الشباب يلي دربتهم ياسر شوشرة وفي محمد شيخ داوود بس هادا ترك النادي حاليا
ليش ما عم نشوف من نادي الوحدة وفاء لللاعبين القدامى
حاليا ما في شي اسمو وفا بنادي الوحدة مثلا أسعد زحاليق مدرس تربية رياضيية نادي الجيش قلو شو بدك مصاري خود بس جبلنا مواهب من البطولات المدرسية يعني نحن مو احق أنو يجبلنا هالمواهب على نادي الوحدة محمود محملجي مو حرام يكون بعيد عن النادي هادا المفروض يكون مستلم تدريب القواعد بالنادي هو والزعتري مثلا محي الدين الدغلي لاعبنا كان مو حرام يكون عم يدرب بالجيش القادري كمان مو حرام هادا يدرب بداريا لازم النادي يستفيد من خبرتو
شو كان شعورك يوم حقق نادي الوحدة بطولة الدوري عام 2004
كنت سعيد جدا لأن هيك نادي كبير وهيك جمهور كبير بيستحق يكون في بخزينته لقب بطولة دوري والفريق كان جيد جدا وكان حينها يلي الو بصمة كبيرة اللاعب اياد مندو كان من أفضل اللاعبين وطبعا الكابتن ماهرالسيد يلي أنا بفتخر فيه أنو ابن حارتي وأخوه عمر السيد كان صديقي وكنا نلعب سوا ونحن وصغار وعلى هالسيرة أنا بدي أتشكر السيد صفوان نظام الدين شكر كتير كبير رغم أني أنا ما بعرفوا معرفة شخصية بس هو كان الو فضل كتير كبير انو سعى للنادي ولللاعبين لحتى وصل لهذا الانجاز وحقق بطولة الدوري للنادي لأنو كان هو مستلم الإدارة ومستلم كل شي وبطولة الدوري ما اجت من فراغ كان الأستاذ صفوان وراها وكانت هالبطولة بتعبو لأنو كان يركض ورا اللاعبين أي لاعب تعرض لإصابة تعرض لمشكلة ويوقف وراه وكأنه أبنه
شو رأيك بوضع الفريق الحالي
وضع الفريق وسط يعني الكابتن نزار أستلم قبل الدوري بشهر يعني فترة قصيرة لا تسمح لأي مدرب بفعل أي شيء وبطلب أنا من الجمهور أنو يطول بالو شوي على الفريق لياخد وقتو لحتى يتأسس بشكل جيد
برأيك شو سبب أبتعاد الجمهور عن الملاعب
السبب هو يلي صار بآخر موسمين بيخلي أكبر جمهور بالعالم يبعد يعني الجمهور لما يلاقي الفريق مرتب وعم يلعب طابة حلوة والإدارة ملتفة حول الفريق لو لعبت وخسرت ما بيزعل بس يعني الواحد لما كل مرة بدو يجي ويهز بدنو بدو يبطل يجي
شو رأيك بالمدربين السوريين الحالين
في مدربين جيدين مثلا الكابتن نزار محروس يلي أنا إلي الفخر أنو ابن ناديي وأني لعبت تحت قيادته وفي محمد قويض مدرب ما في منو وعندو حظ حلو كتير كتير يعني متل ما بيقولوا حظ عطيني وبالبحر ارميني وفي ياسر سباعي مدرب رائع والخانكان من المدربين المحترمين والرائعين واخلاقو عالية جدا
شو رأيك بوضع الرياضة الحالي بعد تطبيق الاحتراف
بعد الاحتراف اختلفت أمور كتير اللاعبين تغيرت هلأ صار اللاعب يلعب لمصلحتوا و أمورو الشخصية ما عم يلعب للنادي كنا نطلع خسرانين نبكي ما نسترجي نرفع راسنا الجمهور يشوفنا برا الملعب نصير نبكي من خجلنا منو بعد ما خيبنا املو هلأ بيطلع اللاعب خسران وعم يضحك ومو سأل على شي بس سؤالو وين المصاري ووين المعاش وبيقلك ما قبضوني واذا ما قبض بيحرد وبيبطل ينزل على التمرين أنا بقيت 18 سنة بالملاعب ما طالعت غير 275000 بمباراة أعتزالي يعني لو لعبت سنة وحدة بعد الاحتراف كنت طالعت قد يلي طالعتوا بحياتي كلها على مرتين وانا لو كنت أتفرغ متل اللاعبين اليوم كنت بتحدى أهم لاعب بسوريا كنت الصبح بالشغل وبعد الظهر بالتمرين وبالليل بالشغل كنا نرجع من المباراة على الشغل
شو قدمتلك الرياضة
بصراحة ما قدمتلي شي بالعكس ضيعتلي عمري كلو يعني متل البرتقالة أخدوها وعصروها وكبوها وما عاد إلي قيمة ولا قدر بالنادي نحن على كتافنا تعمر النادي وآخر شي بتطلع من النادي بدون قدر أو قيمة يعني ما كسبنا غير محبة الجمهور ومحبة العالم اما من النادي ما قدملي شي اخدو هالبرتقالة وعصروها وكبوها
كلمة أخيرة بتقولها لجمهور الوحدة
أنا بشكر هالجمهور الكبير يلي كان يأزرنا وما يقصر ابدا جمهورنا كان رائع ومثالي وهويلي يخلينا نتألق بالنادي ونقدم كل شي الو وبشكرمنتداكم كتير على لمسة الوفا هي وبحب وجه تحية للسيد محمد ماهر جمال الدين يلي كان يوقف معنا دائما وبطلب من نادي الوحدة طلب واحد أنو بس يهتموا بالقواعد لأنو هي القواعد هي يلي قادرة تكمل المجد يلي بنيناه

[ابو كريم]

أين الاستقادة من اللاعبين القدامي
والله لوكنت رئيس نادي الوحدة لتلاقو لاعبين صاعدين كل سنة غير بس !!!!!!
شكرا عالموضوع اخي أحمد

[سعدي]

أحلى ذكريات مع لاعبينا القدامى . .
يعطيك العافية أبو حميد على هاللقاء
و دايما رح تزكرنا بالايام الحلوة

يمكن ما كنا ابطال دوري .. بس هدول اللعيبة ما رح ينمسحوا من ذاكرتنا أبدا

[رغيد]

أهلين خال
وأحلى خال والله

[Ammar Alfarawati]

يمكن ما كنا ابطال دوري .. بس هدول اللعيبة ما رح ينمسحوا من ذاكرتنا أبدا


والله كلمة بالصميم ,, وفعلاً مارح ينمحو من ذاكرتنا , ان شاء الله

شكرا الهم على مجهودهم والجمهور مو نسيانهم


شكرا ابوحميد عاللقاء.

[Ammar Alfarawati]

حاليا ما في شي اسمو وفا بنادي الوحدة مثلا أسعد زحاليق مدرس تربية رياضيية نادي الجيش قلو شو بدك مصاري خود بس جبلنا مواهب من البطولات المدرسية يعني نحن مو احق أنو يجبلنا هالمواهب على نادي الوحدة محمود محملجي مو حرام يكون بعيد عن النادي هادا المفروض يكون مستلم تدريب القواعد بالنادي هو والزعتري مثلا محي الدين الدغلي لاعبنا كان مو حرام يكون عم يدرب بالجيش القادري كمان مو حرام هادا يدرب بداريا لازم النادي يستفيد من خبرتو



هلا معقول نادي الجيش يستفيد من لاعبينا القدامى ونحن مانستفيد منهم ... لك اااااااااخ على هالنادي .

[فهد الناجي]

مشكور ابو حميد
والله يعطيك العافية
وفعلا لازم يستفيدو من خبراتون

[كمال الوحدة]

شكرا جزيلا على هالمقابلة . .
هيك دايما خلونا نتزكر هديك الايام

[ابو وسام]

الله يعطيك الف عافية
ياسيدي لو في بالنادي كم واحد متل العاليا لكان وضع النادي غير

[محمد قطاش]

الله يعطيك العافية والله ورجعتونا للايام الخوالي

[ramyamer]

الله يرحم ايامو...

[W@SEEM]

الله يرحم أيامك كابتن رشدي

ومشكور أخ أحمد على اللقاء

[اياد الوحداوي الشامي]

كلام سليم والله

[عمار عبار]

الله يرحم ايام الهواية كانت احسن

[احمد بيرقدار]

اول شي شكرا لكم جميعا على مروركم وعلى ردودكم الجميلة وتاني شي بتمنى أنو يكون عجبكم لقاء النجم السابق ابو العلا وبالفعل اي كلمة قليلة بحق ابو العلا فعلا انه انسان محترم لدرجة كبيرة جدا ومن الناس الاوفياء والمخلصين للنادي وانا بالفعل كان لي شرف كبير اللقاء معه

[احمد بيرقدار]

شو قدمتلك الرياضة
بصراحة ما قدمتلي شي بالعكس ضيعتلي عمري كلو يعني متل البرتقالة أخدوها وعصروها وكبوها وما عاد إلي قيمة ولا قدر بالنادي نحن على كتافنا تعمر النادي وآخر شي بتطلع من النادي بدون قدر أو قيمة يعني ما كسبنا غير محبة الجمهور ومحبة العالم اما من النادي ما قدملي شي اخدو هالبرتقالة وعصروها وكبوها

والله انو كلام محزن للغاية يعني فعلا شي مو معقول يلي عم نشوفه بالنادي حاليا من قلة وفا لابناءه

[فهد قيطاز]

شكرا أخ أحمد لقاء كتير حلو وصريح وأبو العلا أيام لا تنسى

[احمد بيرقدار]

أهلين خال
وأحلى خال والله

حضرتك ابن اختو لابو العلا مهيك حبيب

[محمد سكر]

فعلا أيام لاتنسى لنجوم البرتقالي القدامى

[عمر نصري]

مشكور ابو حميد

و الله رجعتنا لذكريات الماضي الجميل

[wissam82]

بكل مقابلة مع أحد لاعبينا القدامى منشوف ومنكتشف أكتر
ئديش حجم المشاكل والتخبط بنادينا للأسف ...!!!

والله حرام هيك لاعبين مخلصين وهيك خبرات تطلع من النادي
ونحنا بمس الحاجة لأشخاص متلهم ينتشلوا النادي وقواعده من وضعه ..

كل الشكر للكابتن أبو العلا على هاللقاء الجميل ومنقله أكيد
الجمهور ما رح ينساك ولا ينسى هالجيل الدهبي بوقتكم
والله يرحم أيامكم ..

وكل الشكر ئلك أخي أبو عمر على هاللقاء المتميز
يعطيك العافية ...

[محمود الصفدي]

والله زمان يا أبو العلا اللح يرحم أيام زمان

شكرا أخي أحمد على جهودك

[الوحداوي الاول]

كان ابو العلا تلاقي دائما عم يشرب مي عالخط
تحية كبيرة انت من الجماعة يلي لعبو لنادي مو للمصاري

[يامن الوحداوي]

الله يعطيك الف عافية

[Radwan]

ياريت يكون هناك لقاء خيري لصالح اللاعبين القدماء لنادي الوحدة مع الفريق الحالي كل فترة وتكون فرصة لتعريف الجيل الجديد من الجمهور على الجيل القديم الذي أعطى بسخاء وبدون مقابل مادي لنادي الوحدة .

شكرا" أحمد ولمسة وفاء نتمنى أن تترجمها إدارة النادي مع لاعبينا القدماء ولصالح قواعد النادي .

[هشام المنجد]

اي و الله يابو العلا الله يرحم هديك الايام كان يخسر الفريق و يتعادل ونطلع نحنا و مبسوطين

[Abu Waseem]

الله يعطيك العافية يارب أحمد بيك ويوفقك
أبو العلا شو بدنا نقول عنك وانت مقاتل وحداوي بماللعب كنت
كان أبو العلا قمة لعبه وأداؤه بمباريات الاتحاد ههههه يولع أبو العلا مع الأهلي سواء بالشام او حلب

[أبو رائد الوحداوي]

مشكووووووووووووور ابوحميد الورد عاللقاء والله يعطيك العافية

[رغيد]

حضرتك ابن اختو لابو العلا مهيك حبيب
لا والله بس أبو العلا خال أحد أصدقائي

[أبو جورج الوحداوي]

الله يحميك يا أبو العلا


كان حمال الفريق
و كان اللاعب الأكثر محبوبية لدى باقي الفريق

بس كان بدي اسال أبو العلا أذا كان موجود بلعبة تشرين و الوحدة بال 86 يوم لاعبوا شبابنا ضربوا الحكم الظالم أسامة الشامي و تم شطب 14 نقطة للوحدة

شكرا ً أحمد على اللقاء و شكرا لكل الشباب


بانتظار المزيد

[yanalooo]

يعطيك العافية

[محمد الوحداوي العتيق]

ياحرام شي مؤسف و معيب أنو ما نكرم لاعبين الوحدة القدامى يلي عطو عمرهم لنادينا و الله ادارتنا بحسها أنو مالها علاقة بشي اسمو الوحدة و مصلحة الوحدة
لكن مو حرام ما نستفيد من خبرة هلاعبين وحبهم ووفائهم للنادي و نترك نادي الجيش ياخدهم يا عيب الشوم على قلة الوفاء من ادارتنا

[أبو عبد الرحمن]

الله يذكر هاللاعبين بالخير

[محمد660]

تحياتي للكابتن ابو العلا ..

[talbe]

انا كان معشوقي ابو العلا و هو سبب حبي للوحدة

[محمد660]

ابو العلا يا ابو العلا الف هلا وغلا ياابو العلا