النجم محمود محملجي يجيب على أسئلتكم ...

[احمد بيرقدار]

بعون الله تعالى بدأت بالمشروع الذي تحدثت
عنه سابقا وهو لمسة وفا لللاعبين الوحدة القدامى
أبناء النادي الذين قدموا الكثير للنادي وأشتاقت لهم الجماهير
لمسة وفا بحلقته الأولى أستضاف نجم كبير عشقته
الجماهير البرتقالية قدم الكثير للنادي والمنتخب
إنه ابن نادي الوحدة وابن الشام محمود محملجي أبو كاسم
الذي حل ضيفا على منتدانا وجاوب على جميع أسئلة الأخوة
الأعضاء بكل شفافية وصراحة وكان سعيد بالتواصل مع
جماهير النادي الذي يعشقه
http://www.gulfup.com/files/jpg/PBQ09346.jpg

http://www.gulfup.com/files/jpg/6Vj09346.jpg

المحملجي يرفع الكأس الأسيوية مع منتخب الشباب

http://www.gulfup.com/files/jpg/9mo09346.jpg

عدنان محملجي الإبن الأكبر لأبو كاسم

http://www.gulfup.com/files/jpg/LU910030.jpg
صورتي انا مع أبو كاسم

والآن أترككم مع الأسئلة وأجوبة أبو كاسم عليها وأتمنى أن يعجبكم اللقاء

[احمد بيرقدار]

wissam82
ـــــــــــــــــــــــ

ليش ما عم نشوف أبو كاسم ضمن كوادر النادي سواء مدرب لفرق القواعد والشباب أو غيره
خاصة انه لاعب معشوق من الجماهير البرتقالية ...

هلأ أنا معروف أنو نادي الوحدة هو يلي صنعني وهو يلي كبرني لكن هل أنت بترضى أنو محمود محملجي يعرض نفسه على أشخاص ربما ما بدها وجودي لأنو أنا والحمد لله عن الخطأ ما بسكت وجمهور الوحدة عندي هو رقم 1 ما بكذب عليه وما بوهمو وما بمسح جوخ لحدا
سؤال تاني:

ممكن تحكيلنا بصراحة ليش تركت أو أبُعدت عن ناديك نادي الوحدة
ومين المسؤول عن هالابعاد لما انتقلت لنادي المجد ..؟؟؟

بصراحة أول مشاكلي بنادي الوحدة كان سببها المرض المعروف بهداك الوقت بين كلمة أيمن الحكيم ونزار محروس وأنا الكل بيعرف أني ما بميل لحدا نزار محروس رفيقي وأخي وأيمن الحكيم رفيقي وأخي بس في بعض الأشخاص المندسين بالنادي صاروا يقولوا لأيمن الحكيم أنو محمود محملجي مع نزار محروس وكل الناس بتعرف أنو أنا مع جمهور نادي الوحدة فقط لما نزار محروس ترك النادي وعملوا عليه عصابة وطردوه من نادي الوحدة لأنو في أشخاص معينة بهداك الوقت ما بتلعب إذا نزار موجود طردو نزار متل ما صار بأيمن الحكيم وقت أول مرة أستلم النادي يمكن هاد الحكي جمهور الوحدة ما بيعرفوا بعام ال 94 كمان نفس الشي عصابة اتشكلت على أيمن الحكيم وطرد أيمن الحكيم من نادي الوحدة ونفس العصابة ناقصين 3 أو 4 من القدامى يلي لما أستلم نزار شي أعتزل وشي ترك النادي ومن بينهم فجر ابراهيم يلي هو هلأ مدرب منتخب سوريا نفس العصابة اشتغلت بنزار محروس وعلقت أنا بهالدوامة أنا لا مع نزار ولا مع أيمن ولا مع أي شخص بالنادي أنا معروف طول عمري أني مع جمهور النادي فقط وإذا بدهم أدلة يوم يلي نزلنا على الدرجة التانية أنعرض علي الأحتراف وبقيت بالنادي كرمال جمهور النادي ولحد الآن إذا عم تابع النادي وشجعوا كرمال جمهوره وليس للأشخاص الموجودة لأنو نادي الوحدة حاليا هو عبارة عن خرابة حولوا بعض الأشخاص لخرابة طبعا لا اقصد نزار محروس بكلامي بس بعض الأشخاص يلي حفروا بالنادي وروحوا القواعد وروحوا النادي كلو استخسروا يعملوا برنامج للقواعد هالقواعد يلي هي خرجت المحملجي ولؤي طالب وماهر السيد يعني للأسف ما عم نشوف قواعد أبدا بنادي الوحدة يعني بعد المحملجي مين طلع نجم على مستوى سوريا غير ماهر السيد هلأ النادي صار عبارة عن عطيني معاشي عطيني مصاريي رغم أنو أنا إذا بجمع كل المصاري يلي قبضتها من نادي الوحدة ب18 سنة ما بتطلع شي لأنو أنا كان معاشي ما بيتجاوز الفين تلاتة وإيمتى بآخر أيامي أنا بقيت ألعب عشر سنين بنادي الوحدة والمنتخب وما أقبض ليرة سوري وأنا عندي وظيفة بقرار من السيد رئيس الجمهورية يعني تصورا قرار وظيفتي يلي من السيد الرئيس يلي كرمنا فيه يوم حققنا كأس أسيا لهلأ ما وظفوني وتخيلوا أنو محمود محملجي اليوم ما عندو أي وظيفة أو عمل بعد كل شي قدموا للمنتخب والنادي يعني الواحد من وين بدو يلاقيها من نادي الوحدة الأم يلي أنا بنظري ما عاد أم بطلت كلمة أم وبطلت كلمة غضب ورضا كانوا يطالبونا بالوفاء للنادي لكن اليوم وين وفاء النادي للمحملجي يعني لو نادي الوحدة في خيرلأبناؤا بيجيبوا المحملجي يلي قضى كل عمروا بنادي الوحدة لاعب وطالب مدرسة وحاليا ما عندو أي عمل

مين المهاجم الأفضل بالوقت الحالي بسورية برأيك ..؟؟؟

أفضل مهاجم بسوريا وأفضل خط وسط بسوريا وأفضل لاعب
بسوريا ماهر السيد هادا نجم ما في منو حاليا بسوريا

- شو فريقك المفضل عالميا وشو المنتخب المفضل عالميا عندك ..؟؟؟

الفريق المفضل الوحدة والأرجنتين وحتى بكأس العالم وقت
يسألوني مع مين بقلهم الوحدة والأرجنتين

[احمد بيرقدار]

waseem dalloul
ـــــــــــــــــــــــــــــــــــ

شو شعورك بعد تسجيلك هدفين في مرمى اليابان عام 1994 حتى ولو بدنا نرجعك 12 سنة لورا .

بتصدق إذا بقلك كان شعوري بس أني ألعب وسجل وأرفع أسم
ناديي ماكان في شعور كان في فطبول في محبة في وفاء للكنزة
البرتقالي وكنزة المنتخب وما كنت عرفان شو عم يصير بسوريا

2- شو أحلى لحظات عشتها بحياتك الرياضية ؟

أحلى لحظات عشتها وقت قابلت السيد الرئيس وندمان لأني ما
حكيت لأنو لو حكينا كنا فهمناه الرياضة أكتر يلي بعد ما طلع
قرار من سيادتو لصالحي لهلأ ما توظفت


__________________________________________________ _________________________________________________


محمود الصفدي
ـــــــــــــــــــــــــــ
بعد التحية والسلام الى عيون محمود محملجي( أبو كاسم ) كيفك شو اخبارك بدي أسالك بكل صراحة مالك ندمان على اعتزالك من اللعب وماهي الاسباب وما هو اجمل هدف في حياتك الرياضية وشكر وكل عام وانت بخير وجميع القائمين على متابعت اخبار نادي الوحدة بالف الف الف خير أضحى مبارك أنشاء الله تعالى

أسباب أعتزالي هي نفسها أسباب أبتعادي عن نادي الوحدة
لأنو في مشكلة كانت برجع بقولها بين الحكيم والمحروس
وخالد حبوباتي وبعض الناس حولوني لشماعة بين الطرفين
ويدخلوني طرف بمشاكلهم لأنو بيعرفوا أنو الجمهور بيحب
المحملجي وكلمتوا مسموعة عند الجمهور
وصاروا يقولوا أني أنا قلت إذابيجي الحكيم أنا مع المحروس
فسبب أبتعادي كان أنو أيمن الحكيم أستخدم أسلوب محاربة
المحملجي وبفضل رب العالمين أنا ما كان حدا يقدر يحاربني
لا أيمن الحكيم ولا غيرو لأنو أنا كان جمهور الوحدة كلو معي
ولا مدرب قدر يحاربني جابوا نيزو البرازيلي صار صديق إلي
وقلي أنو عم يشتغلوا فيك بالإدارة وما سألت عليهم لأنو أنا
بنظري هؤلاء صغار بالفطبول أما المشكلة يلي كانت وراء
ابتعادي أنو أستخدم أيمن الحكيم أسلوب محاربة الضعفاء
بالنادي أمثال صفوان حبايب وابراهيم كبتول حرم اللعيبة من
بعض الأمور وهو بيعرف أنو بنزعج من هالقصص ودخلت
لعندو لأيمن وطالبتوا وقلتلوا أنت ليش هيك عم تعمل بالشباب
قلي أنت عليك من حالك وما دخلك بغيرك وصارت مشكلة بيني
وبينو وبعد هالشي بسمع أنو أيمن الحكيم وخالد حبوباتي
أرسلوا تنازل عني عن عضويتي بنادي الوحدة وبالذات لشخص
أسمو موفق الشعار ويلي كان مسؤول عن نادي النضال الشعار
اتصل فيي وقلي تعى لعندي عاوزك رحت لعندوا قلي نادي
الوحدة تنازل عنك أنت وصفوان وابراهيم ضاج جمهور الوحدة
وعملوا مشاكل فأجتمع فيي أحمد قوطرش أنا وصفوان وابراهيم
على أساس أنو أرجع لنادي الوحدة قلتلوا أنا برجع بس ليش
عملتوا تنازل وتنازلتوا على الرغم أنو اجاني عرض احتراف
ما عطيتوني التنازل قال في أمور غلطنا نحن فيها وطالبين
منك أنك ترجع قلتلوا أنا برجع وأنا كنت بوقتها مقدم على
مشروع خطبة وكان واعدني الحبوباتي أنو يتكفل بالموضوع
لأنو بتعرفوا أنو نحن جماعة طلاب مدارس طلبت منو وقتها
مبلغ تلاتمية ألف ليرة سوري لأخطب وصفوان طلب نفس
المبلغ وابراهيم نفس المبلغ وقوطرش كان أثنائها في غشاوة
على وشو كان هو مع ايمن الحكيم وصار يذيع بين الجماهير
أني أنا طلبت مليون ليرة لحالي مشان أرجع لحتى يشوه
صورتي امامهم قمت قلتلوا أنا بطلت الرياضة كلها هاد كان
سبب خروجي من نادي الوحدة والأستاذ فراس معلا والأستاذ
صلاح رمضان بعد ما وقفوا معي بالمشاكل يلي صارت
طلبوا مني أنو تعى العب عنا بنادي المجد سنة سنتين وبعدين
بتعتزل وبالفعل لعبت سنتين وبعدين أعتزلت


__________________________________________________ ________________________________

محمد شبعانيه
ـــــــــــــــــــــ

هل ترى وضع الكرة السورية يوما بعد يوم للوراء اما ماذا

الكرة السورية للوراء الوراء الوراء وما بتتقدم بحياتها

كيف كان شعورك وانت ترى الفريق يحقق بطولة الدوري مع الكاس مع وصافة كاس الاتحاد الاسيوي على ايام المرحوم نيناد

كنت سعيد لجمهور نادي الوحدة ووالله مو للنادي للجمهور لأنو
هيك جمهور بيستاهل بطولة الدوري بس مو بهيك عالم

كيف ترى الاوضاع في النادي بوجود الكابتن ابو حامد و لماذا لا تكون ضمن اسوار النادي

كل الناس بتعرف أنو نزار محروس مدرب ذكي جدا وان شاء
الله بتنصلح الأوضاع على ايديه

__________________________________________________ ___________________

وحداوي كاسر
ـــــــــــــــــــــــ

أفضل تشكيلة لعبت معها

لاتواخذوني بهالكلمة بس ما لعبت مع تشكيلة معينة بيجي نزار
بنلعب مع شلة نزار بيجي ايمن بنلعب مع شلة ايمن بيجي واحد
أنا كان كل همي سجل الهدف والسلام عليكم

نادي كنت تتمنى اللعب معه غير الوحدة


ما كنت حب غير الوحدة

[احمد بيرقدار]

احمد وسيم
ـــــــــــــــــ

هلا وغلا بالنجم أبو كاسم
كابتن محمود شو حظوظ الوحدة برأيك بهالموسم وشو نصيحتك للاعبين الشباب بنادي الوحدة
ان شاء الله بينافس على المراكز التلاتة الأوائل
وبالنسبة للشباب أنا مالي شايف لا شباب ولا
ناشئين ولا أشبال

وطمنا عن أخر أخبارك هل طلقت الكرة مرة وحدة أم رح نشوفك قريبا بناديك يلي أحبك وجماهيرك يلي عشقتك
وتمنى منك ترجع متل مارجع الكابتن لؤي طالب

أنا ماطلقت الرياضة ولا حطلقها بس مو أبو كاسم يلي بيعرض
حالو على نادي الوحدة لو بيقلولي اعرض حالك هلأ على
جمهور الوحدة بروح بعرض حالي عليه لأنو جمهور الوحدة
معروف شو هو اما النادي ما بعرض حالي عليه لانو كل شي
معروض بيرخص

_________________________________________

خيرو
ـــــــــــ
محمود محملجي ..... رجاء أن تعمل دورة للشباب على الضربات الراسية والدبلتيكات ....
والله اشتقنالك


هادا من محبتك الزايدة فيي أنا بدي مين يعملي دورة

_________________________________

واصف امين
ـــــــــــــــــ

بعد التحية والسلام والاشواق الكثيرة
حابب اسالك انا ومجموعة من محبي الوحدة في السعودية
عن اخر اخبارك وتطلعاتك المستقبلية على الصعيد الشخصي

أول شي بالنسبة على الصعيد الشخصي الله أكرمني
أني هلأ ماشي بأمور التزامي من الناحية الدينية وعم أدرس
سنة رابعة شريعة بكلية الدعوة

وشو بتوجه كلمة لكل اللذين يحبوك وفقدولك كتييييييييير

بقلهم والله وأنا أشتقتلكم كتير وبتمنى كون معكم بنادي الوحدة
لأنقلكم الصورة الحقيقية والصادقة وما ألعب بأعصابكم

وبشوبتنصح لاعبي الوحدة الحاليين
نتمنى لك الصحة والعافية

المشكلة يا أخي الكريم أنو أنت عم تقول لاعبين الوحدة الحاليين
ليش في لاعبين وحدة هلأ كل واحد همو شو معاشو وشو مقدم
عقدو سالني شو بتنصح اللاعب يلي جايبينوا على نادي الوحدة

_________________________________________

فهد قيطاز
ـــــــــــ

كابتن محمود بأسمي واسم جميع الوحداوية نطالب بعودتك للعمل بناديك الأم الوحدة وبدون أعزارأذا ظروفك ما بتسمح بهل وقت أعطينى وعد برجوعك لو بعد حين لأن شخص متلك حرام يحرم النادي من خبرتووبكفي أنك وحداوي أصيل والجميع بيذكر لما نزل الوحدة على الدرجة الثانية رفضت الاحتراف مع اي نادي محلي او خارجي كبير أبو كاسم ونادي الوحدة بحاجة لمثالك المخلصين لقميص النادي وبتمنى عدم تجاهل مدخلتي يا أبو كاسم الغالي شتئلك ملعب العباسيين وجماهيرة

أول شي شكرا الك كتير على كلامك الحلو
وأنا ما عندي أي أعذار برجع بقول وبذكر لجمهور نادي الوحدة
محمود محملجي ليس لديه عمل ولا في أي شي بيمنعني عن
العمل في نادي الوحدة ولا أي شي أبداو لا ملتزم مع حدا متفرغ
تماما

[احمد بيرقدار]

بو علي
ــــــــــــ


احلا كابتن ابو كاسم الغالي النجم الكبير الهداف المتميز
سؤالي الك ابو كاسم مين افضل اداره مرت على نادي الوحده
ويسعدلي اوقاتك


مافي شخص دخل على نادي الوحدة في نوع من السوء
بس العطل كان بالأنقسام بين الإدارة تلاتة مع شخص واربعة
مع شخص

محمد660
ـــــــــــــــــ

تحية ابو كاسم... الكل ممكن يسألك عن أجمل مباراة لعبتها ..ولكن انا بدي اسألك عن مباراة كنت تتمنى أنك لم تلعبها ولك الشكر.

في مباراة الوحدة والكرامة يلي انتهت خمسة صفر للكرامة
بحمص لأنو وقتها كانوا مانعين لعيبة المنتخب تلعب مع
أنديتها وكنت بالفندق وكل ما أسمع هدف للكرامة بالراديو
أنزعج كتير

_________________________________________

yanalooo
ـــــــــــــــــــــــــ

أهلا وسهلا بالكابتن محمود محملجي وأنا من أشد المعجبين فيك
شو رأيك بفريق الوحدة هي السنة
جاوبنا سابقا
مين هو اللاعب يلي بتشوف في محمود محملجي
أنت هيك كبرت المحملجي كل الموجودين أحسن من المحملجي

_________________________________________

wahdawe super
ـــــــــــــــــــــــــــــــــــــــــــــ


بدي أسألك بالنسبة للنادي ,
ومشكلتنا بالقواعد الحالية شو الحل الها برأيك
بالنسبة للفئات الصغيرة ناشئين وأشبال
بما أنو عنا ضعف كبير بالنادي
الحل برأي أنو يجي أشخاص للقواعد بتفهم بالرياضة
مدربين على مستوى عالي

مين اللاعب الحالي بالوحدة يلي بتشوف في نجم المستقبل ؟
النجم بالوحدة ماهر السيد
وشو المشاكل يلي خلتلك تبتعد عن نادي الوحدة
حكينا سابقا

[احمد بيرقدار]

الأدعشري
ــــــــــــــــ

اول شي يسعدلي مساك يا ابو كاسم اللي كنت بالعصر الذهبي لفريق الوحدة نكهة الفريق اسئلتي كتيرة شوي ابو كاسم بدي بلش الحركة اللي بيعشقها جمهور الوحدة منك هو تغطية وشك بالقميص بعد كل هدف شو سرها؟
هي سرها أنو قد ما سجلت أهداف لنادي الوحدة ببقى خجلان
بوشي منكم ولو سجلت هدفين أو تلاتة بخبي وشي وما برفع
راسي قدام الجمهور يلي بيستاهل أكتر من هيك
هل تعتقد انو هدفك على بردى بموسوم 99-2000 هو اجمل هدف سجلتو بحياتك؟
ممكن هدفي على بردى من الأهداف الجميلة ولكن بيبقى هدفي
على الاتحاد بفسط حلب هو الأغلى
هل تذكر ردة فعل الجمهور وقت لغى الحكم هدفك على فريق الجيش في اخر المبارة موسم 2000-2001 وشو كان شعورك وقتها؟
والله كان شعوري وهمي مو أنو الغي هدف إلي شعوري أنو
جمهور الوحدة شو بدو يصير فيه
ما هي الأطراف التي كانت وراء ابعادك عن النادي ؟
الإدارة الموجودة بوقتها وطبعا أيمن الحكيم
تعليقك على مبارة الوحدة والجيش لما صارت بالفيحاء وقلبنا تأخرنا بالشوط التاني 2 صفر لفوز 3-2 والفرق بين جمهور الوحدة بهديك الفترة و جمهور الوحدة الحالي؟
طبعا كنت سعيد جدايومها لهاد الجمهورالكبير يلي شعل
المدرجات بحضوره وقدر انو يجبر اتحاد الفطبول بوقتها
أنو ملعب العباسين يكون لنادي الوحدة بعد أن طف ملعب
الفيحاء بالجمهور الوحداوي بس أنا هون حابب أسألك بتعرف
مين كان مدرب الجيش يومها
شو بتحب توجه لكمة لجمهور الوحدة اللي ما بينسى المحملجي؟
بوجه كلمة وحيدة شكرا كتير الكم على كل شي عملتوه بس
لا تنسوا محمود محملجي
__________________________________________________ ___________________

ابن الشام1
ـــــــــــــــــــ

اهلا وسهلا بالغالي واللي بذكرنا بالعصر الغالي
انا بتمنى اعرف شي عن حياتو الخاصة بعد اعتزالو
يعني شغلو كم ولد عندو ومين النادي العالمي ييلي بشجعو

بالنسبة للشغل حاليا ما في أي شغل بالنسبة للوضع العائلي
الحمد لله تزوجت وعندي ولدين عدنان ورجب ما بشجع
غير الوحدة والارجنتين

__________________________________________________ ________________________________




حسام الوحدة
ـــــــــــــــــــــــــــ

نجم النجوم بنادي الوحدة اللي كتير من الناس حبو هالنادي
بسبب تأثرهم فيك او بنجوم أخرين مثل الكابتن نزار او الكابتن لؤي
او غيرهم بس انت كنت غير نكهة غير حياة ربي يسعدك
انا بدي أسأل برأيك ليش من فترة طويلة لم يخرج من نادي الوحدة
نجم مثلك او مثل لؤي او نزار او ماهر او عساف يعني من فترة طويلة
وخصوصاً الهدافين يعني من وقت تركت اللعب ماشفنا مهاجم سد مكانك
وسامحني للأطالة وبدنا رأيك وردك بصراحة




كلامك هاد بيأكد على كلامي يلي كنت عم أحكيه انو في ناس
بنادي الوحدة عم يحاولوا يخربوا نادي الوحدة من أساسو
وخربوه روح شوف نادي الوحدة وين القواعد القواعد كلها
منتهية ليش لأنو هنن ضد نادي الوحدة من الأساس

[احمد بيرقدار]

همام
ـــــــــ
بحب وجه تحية كبيرة لنجمنا الكبير أبو كاسم
يللي ما في بيت بالشام الا و مفوت عليه الفرحة بلعبك و جوالك يللي ما بتنتسى
سؤالي الك ... شو رأيك بالمنتديات الالكترونية متل منتدانا و برأيك عملت دور ايجابي ولا سلبي لمصلحة النادي
و كيف فينا نكون ايجابيين أكتر كمحرك لجزء كبير من الجماهير يللي بتكون بالملعب
هي بتعمل أدوار ايجابية بس خاصة للمثقفين بس لا تنسى
أنو عنا الجمهور الرياضي بسوريا المثقفين قلال وبتمنى
الاقبال عليها بشكل اكبر
__________________________________________________ ___________________

Nassib kabbani
ـــــــــــــــــــــــــــــــــــــ
اولا بدي سلم على احسن مهاجم بتاريخ الوحدة اذا ما اعتبرنا عساف لاعب شامل
تانيا ليش ما عمل مباراة اعتزال؟
يمكن أنت نسيان أخي الكريم عملنا مباراة مع منتخب شباب
سوريا وبشكر بالمناسبة كل الجمهور يلي حضر المباراة
ويلي ما خيب ظني فيه
ثالثا هل ندم على تركه البيت الوحداوي والانتقال الى المجد ؟ وهل السبب كان مادي؟
حكيت سابقا عن الاسباب وما كانت مادية ابدا ولو كان تفكيري
مادي كنت تركت نادي الوحدة ورحت احترفت
رابعا شو عندو اولاد وشو عم يشتغل وبيفكر بالتدريب؟

شغل حاليا مافي وان شاء الله بس تصير دورة تدريبية بالشام
بدي قدم عليها
__________________________________________________ ___________________

أبو رائد الوحداوي
ــــــــــــــــــــــــــ
وين صفيان وليش مثلا ما منشوفك عم درب بقواعد النادي
مشكلتي والسبب أنو ما بدهم وجودي بالنادي هو محبتكم
إلي كرهوني انتو بيجبوني على النادي وبيخافوا من موضوع
أني أنا ما بسكت وما بحب العب باعصاب الجمهور
بهل الفترة يللي غبتها عن الوحدة كنت عم تابع اخباروه يعني بالمختصر انت وحداوي ولا مجرد لاعب كان يلعب بنادي الوحدة
من دون مجاملات
بالتأكيد أنا وحداوي وبعشق نادي الوحدة من صغري بس
حاليا ما بحب غير جمهور النادي
برايك الكابتن نزار قادر ان يفعل ما فعله المرحوم نيناد من احراز بطولة الدوري والكاس في ظل الطريقة الدفاعية التي يلعب بها
طبعا نزار محروس مدرب كبير وقادر على تحقيق الانجازات
لساتك ساكن بالسويقة اي رزق الله وقت رحنا على بيتك سنة 94 وقت حطيت كولين عل اليابان وصرنا نقول للوالدة وين السكاكر وين السكاكر
اي لسه ساكن بالسويقة وتعى لعنا بنعطيك سكاكر
__________________________________________________ __________________

ابو جواد المناع
ـــــــــــــــــــــــــــ
اخي اب كاسم جمورنا بعمرو مابينساك لانو يلي
من أمثالك عملة نادرة مابتنتسى
هادا كلو فضلو بيرجع لجمهورالوحدة ولو لا جمهور الوحدة
ما انشهر المحملجي وبعدين أنتو يلي سميتوني أبو كاسم
وصدقني جمهور الوحدة يلي ما بينتسى

عماتابع اخبارك شو صار بدراسة الشريعة وشو ناوي تعمل
لوين وصلت ومعرفتك بترفع الراس
سنة رابعة شريعة

[احمد بيرقدار]

أول شي بتمنى أنو يكون عجبكم اللقاء
مع النجم الكبير ابو كاسم وتاني شي
بدي أعتذر من الأخوة الأعضاء عن
التأخير الذي حدث باللقاء والسبب
كان أنشغالي بفترة العيد وما بعد العيد
بالعمل وأن شاء الله هالتأخير ما عاد
يتكرر بالمقابلات القادمة وبالمناسبة
ضيف الحلقة الثانية من لمسة وفا حيكون
النجم رشدي الحلبي وان شاء الله بعد كم يوم
بنزل موضوع لأجل طرح الأسئلة لأبو العلا

[فهد قيطاز]

الله يعطيك العافية يا أخ أحمد

[bmekhaled]

الله يسلم هالايدين
والله شغل أكتر من رائع

[احمد بيرقدار]

الله يعطيك العافية يا أخ أحمد


الله يعافيك يا اخي فهد وعلى فكرة أخ فهد
كلامك أثر كتير بأبو كاسم وطلب مني أتشكرك

[محمد شبعانيه]

مشكور كتير اخ احمد انت وابو كاسم

بالفعل شي مو طبيعي يلي بصير بنادي الوحدة

مو اي شخص بفكر يفوت على نادي الوحدة من محبتو فيه و بكرة القدم يا اما ما بفوت لانو مو متابع للرياضة
بس هي العالم شو تفكيرها ؟؟؟؟؟؟؟؟؟؟؟؟؟

[wissam82]

واضح إنه النجم الكبير محمود محملجي معاني كتير للأسف
من موضوع الشللية والعصابات الموجودة بالنادي من زمان ..

وهو حكى وجاوب بكل صراحة عن الأسئلة وفعلا كلامه محزن
كتير للأسف لانه هالمرض يلي بالنادي ما كنا نخلص منه ..

بكل الأحوال منتمنالك أفضل الأيام يا أبو كاسم والله يوفقك وين ما كنت
والله يفرجها على نادينا ويخلصنا من هالمرض يلي اسمه شللية ...


وأنت أبو حميد يعطيك ألف عافية يا غالي
لقاء مشوق وبمنتهى الصراحة ,, يسلمووو ايديك ..

[nano]

شكرا أخي احمد على مجهودك الكبير والله يعطيك ألف عافية
وياريت تعملو حملة لإعادة هيك خبرات لبيتها اللأول والأخير ويوصل الأمر للأدارة

[احمد بيرقدار]

واضح إنه النجم الكبير محمود محملجي معاني كتير للأسف
من موضوع الشللية والعصابات الموجودة بالنادي من زمان ..

وهو حكى وجاوب بكل صراحة عن الأسئلة وفعلا كلامه محزن
كتير للأسف لانه هالمرض يلي بالنادي ما كنا نخلص منه ..

بكل الأحوال منتمنالك أفضل الأيام يا أبو كاسم والله يوفقك وين ما كنت
والله يفرجها على نادينا ويخلصنا من هالمرض يلي اسمه شللية ...


وأنت أبو حميد يعطيك ألف عافية يا غالي
لقاء مشوق وبمنتهى الصراحة ,, يسلمووو ايديك ..

الله يعافيك يا اخي وسام
ومشكور لمرورك وبالفعل
وضع ابو كاسم سيء للغاية
لأنو كان لاعب مهذب ولو كان
مع شلة او مع عصابة عم تحميه
كنت لقيت وضعو غير هيك

[احمد بيرقدار]

شكرا أخي احمد على مجهودك الكبير والله يعطيك ألف عافية


وياريت تعملو حملة لإعادة هيك خبرات لبيتها اللأول والأخير ويوصل الأمر للأدارة


والله هاد الكلام المظبوط لازم بمنتدى الوحداوية
نحاول نعمل شي كرمال ابو كاسم
ونطالب الادارة بعودة ابو كاسم لناديه الام

[ابن الشام1]

اهلا وسهلا بااخي ابو كاسم انا بعرفك شخصيا من زمان بس صرلي فترة طويلة بدبي على كل حال اهلا وسهلا بمنتداك وسؤالي هوي شو رايك بالمحترفين لجداد بنادي الوحدة او بالاحرى الانتقالات

الجديدة والف شكر على رحابت صدرك

[Abu Waseem]

ولله كتير كتير انزعجت
للأسف أخ أحمد (طبعاً الله يعطيك العافية على جهدك وتعبك ويوفقك يارب) للأسف كتير أخبار بتزعل وياحيف وياخسارة يانادينا المطنش

[talbe]

معقول المحملجي بلا شغل

[RvH]

يعني كلام محزن جداً
لازم كلنا نطالب الإدارة إنو يرجع أبو كاسم للنادي

[احمد بيرقدار]

معقول المحملجي بلا شغل

والله للأسف شغلة بتحز بالنفس كتير
ومو ممكن حدا يصدقها

[MOH@MAD]

الله يعطيك العافية أخ أحمد عاللقاء المتميز

[أبو رائد الوحداوي]

مشكووووووووووووور ابو حميد الورد واخ على هل النادي يللي ما بيحترم لاعبينو وحتى جمهوره كمان ولك بزمتكون شو بيفرق نادي الوحدة عن الاتحاد الرياضي مشان الله حدا يجاوبني ولا حدا ينطلي متل حمصة الكي ويقول بطل تشجيع هادا النادي بيمثل دمشق وما لازم يكون هيك وضعو خلونا نتعلم من جمهور الكرامة والاتحاد ولك شوفو شلون الاتحاد متصدر والعالم نازلة انتقادات بالمدرب وبالادارة يعني مو غلط الواحد يتمنى انو يكون ناديه افضل نادي بالعالم بس للاسف الواحد اذا حكى بيقولو عنو مندس والعصابات يللي بالنادي هيك بدها

[أبو رائد الوحداوي]

تعليقك على مبارة الوحدة والجيش لما صارت بالفيحاء وقلبنا تأخرنا بالشوط التاني 2 صفر لفوز 3-2 والفرق بين جمهور الوحدة بهديك الفترة و جمهور الوحدة الحالي؟
طبعا كنت سعيد جدايومها لهاد الجمهورالكبير يلي شعل
المدرجات بحضوره وقدر انو يجبر اتحاد الفطبول بوقتها
أنو ملعب العباسين يكون لنادي الوحدة بعد أن طف ملعب
الفيحاء بالجمهور الوحداوي بس أنا هون حابب أسألك بتعرف
مين كان مدرب الجيش يومها
كبير يا حارة كبير والله وقت كنا نستناك بالدقيقة وقت تنزل من البيت تروح عالتمرين كان عنا احساس انو عم نستنا بطل واحساسنا ما خاب وهي رجال السويقة الابية كلمة الحق ولو على اطع راسون وانتمائنا للوحدة مو لاشخاص

[Ammar Alfarawati]

الف شكر الك احمد ويعطيك العافية ..

من اسباب عشقي للبرتقالي وبسببه شجعت البرتقالي هو ابوكاسم ,, وقت كان يسجل غول الكل ينطرب وخاصة انو اهدافه الها نكهة خاصة ... ابوكاسم شكرا الك عالمقابلة الصريحة.

[فهد قيطاز]

والله هاد الكلام المظبوط لازم بمنتدى الوحداوية
نحاول نعمل شي كرمال ابو كاسم
ونطالب الادارة بعودة ابو كاسم لناديه الام
ولله 100 بالمية

[W@SEEM]

مشكور أخ أحمد والله يعطيك العافية

وشكرا للكابتن أبو كاسم .. والله يكون معه ... فعلا حرام يلي عمبيصير بأبو كاسم

[أغيد الفرا]

يعطيك العافية اخ احمد

و تحية كبيرة للنجم ابو كاسم .. بس معقول ماعم يشتغل هلأ و بالنادي ماحدا متذكرو ؟؟ و الله عيب

[محمد ربيع]

السلام عليكم كيفك نجمنا الكبير ابو كاسم سؤال مين تتوقع ياخد بطولة الدوري هاد الموسم وشكرا

[noel]

آخ شو بحبو لهل لاعب

بتقولوا رجا رافع احسن هداف و الله متل راس المحملجي ما في
بتزكر غول التعادل ع تشرين لما طحش من نص الملعب و فوت غووول

[عمار عبار]

من فات قديمه تاه

[محمد660]

الله يوفقك (ابو كاسم) بدراستك وبحياتك وشكرا" على الردود اللطيفة.

[محمد فواز البيرقدار]

شكرا أخ أحمد على هذا اللقاء القيم وشكرا لجهودك المضنية بمقابلة اللاعبين ، ومشروعك ( لمسة وفا ) فيه الكثير من الوفاء للاعبين الذين قدموا الكثير للنادي ويا ريت يكون لقاءك القادم مع أبو العلا رشدي الحلبي لأنو الكل بحبو وبيتمنى يعرف أخباره
ومن بعدو لا تنسى الزحاليق والحبايب والكبتول وسامي جمعة ونجوم الفريق السابق

[ابو موفق]

والله شي روعة

[WALID STAR]

بالتوفيق يا محمود

[Basti]

شكرا الك على هالعمل
و ابو كاسم حبيب قلبنا منتمنى نشوفه بكوادر نادينا مثلا كشاف مواهب
وعنجد دبنا عغيابك دبنا

[ابو وسام]

احلى تحية لابو كاسم
والله العظيم حرام اب كاسم بلا شغل ياحيف والله ينتقم من كل اللي وقف ضدك

[محمد اشرق لبن]

مشكور كتير اخ احمد وشكرا على هالمجهود

[حسام الوحدة]

ولو انو متأخر بس الله يعطيك الف عافية عاللقاء
والله لا يسامح اللي ببالي اللي طول العمر رح ضل حاقد عليه
لأني انا وحداوي من 90 وبعرف كل صغيرة وكبيرة بالنادي بوقتها
وياما دخلت بيوت اللاعبين مع الوالد وياما اجتمعت فيهم وبعرف شو اللي صار
والله يوفقهم يارب والله معكم

[سعدي]

بتصدق أخي احمد ؟
قرأت الموضوع كذا مرة
و كل مرة كنت اتزكر أحد اهداف ابو كاسم اللي فرحنا فيها كتير . .
عنجد ايام ما بتنتسى . .
صحيح ما كنا نجيب بطولات بس كانت محبة الجمهور للنادي و ولاد النادي اكتر من هلأ بكتير
الله يعطيك الف عافية

[أبو جورج الوحداوي]

شكرا ً



ابوكاسم


لاعب ممتازكثير


يا ريت عنا متلو هلق

[Radwan]

محمود محملجي هو النجم الذي يجمع على محبته كل الوحداوين الشوام

[أبو عرب]

محمود محملجي هو النجم الذي يجمع على محبته كل الوحداوين الشوام


:)) وبحب ضيف انو من بعدو الوحدة .... بلا كابتن :))

[محمد بشار الوحداوي]

الكابتن محمود انشالله لح يكون مساعد مدرب الرجال منستفيد من خبرتو كمان

[عدنان شيخاني]

لك والله بحبك يا كوتش الله يسامح يلي خلاك تترك الفريق

[maherdamas]

وحداووووووووووووووووووووووووووووووووية

[ابن الصالحية]

والله المحملجي كان شغلة
الله محيي أصلو

[ابو عمر الدمشقي]

مشكور عالموضوع

[عاشق الجاذبية]

الله يرحم ايامو
كان نجم من نجوم
البرتقالة
ونجم سوريا

[PHILIPP LAHM]

شكرا الك على هالمقابلة الحلوة مع نجم رائع

[ابوالعبد الوحداوي]

لك هادا الموضوع صرلووووو سنتيييييين مين نكشوووووووو ..؟؟؟؟؟!!!!

[هنو]

هي احدى لقاءاتنا مع الراحل

كيف انتكش معي الموضوع مابعرف:))

[هنو]

والله وانا عم اقرأ دمعت عيوني

الله يرحمو شوكان فعلا عاشق للبرتقالي

[الكتلوني]

بجد الله يرحمو والله لهلأ مو مصدق انا

[برتقالي للعظم]

هي احدى لقاءاتنا مع الراحل

كيف انتكش معي الموضوع مابعرف:))

شكراً على تذكرينا باللقاء

بس بدي قول شغلة لفتت نظري
عنوان الموضوع لمسة وفاء.. وللأسف ولحد هاللحظة ما شفنا اي لمسة وفاء للمحملجي من وقت ما ترك اللعب ولحد هاللحظة
منتمنى الوضع يتحسن لأن المصاري يلي عم تنكب على لاعب أجنبي مو أهم من ابن النادي وهلأ أكيد عائلة المرحوم بحاجة للمسة وفا لإنسان كان وسيبقى رمز من رموز النادي.
عسى أن يكون هناك أذن صاغية

[ابن الصالحية]

شكراً على تذكرينا باللقاء

بس بدي قول شغلة لفتت نظري
عنوان الموضوع لمسة وفاء.. وللأسف ولحد هاللحظة ما شفنا اي لمسة وفاء للمحملجي من وقت ما ترك اللعب ولحد هاللحظة
منتمنى الوضع يتحسن لأن المصاري يلي عم تنكب على لاعب أجنبي مو أهم من ابن النادي وهلأ أكيد عائلة المرحوم بحاجة للمسة وفا لإنسان كان وسيبقى رمز من رموز النادي.
عسى أن يكون هناك أذن صاغية

والله لازم يصير هيك
لازم يتكرم أهل اللاعب بهيك ظروف وخصوصا إذا كان لاعب ممتاز ومخلص متل المحملجي
بس عنا للاسف ما بيصير هيك شي اسالوني انا كان ابن عمي بطل بالمصارعة الرومانية و توفى بعز شبابو وما حدى تذكرو ولا حدا كرمو او كرم اهلو ومالازم نستغرب لانو الاحياء عنا ما بيهتموا فيهم فكيف الاموات

[ابو هاشم التركماني1]

كان لاعب كبير
رحمة الله عليك يا ابو كاسم

[nano]

الله يرحمو ويجعل مثواه الجنة

وشكرا لأحمد بيرقدار لانو وقتا كان عم يشتغل من ئلبو للنادي وبدون مقابل وعم يشتغل بس لانو بحب الوحدة ..الله يرحم أيام زمان
ويرحم الكابتن محمود محملجي ..الطيب بيبقى ذكره بين الناس عايش مابيموت ابدا ..

[Radwan]

شكراً على تذكرينا باللقاء

بس بدي قول شغلة لفتت نظري
عنوان الموضوع لمسة وفاء.. وللأسف ولحد هاللحظة ما شفنا اي لمسة وفاء للمحملجي من وقت ما ترك اللعب ولحد هاللحظة
منتمنى الوضع يتحسن لأن المصاري يلي عم تنكب على لاعب أجنبي مو أهم من ابن النادي وهلأ أكيد عائلة المرحوم بحاجة للمسة وفا لإنسان كان وسيبقى رمز من رموز النادي.
عسى أن يكون هناك أذن صاغية


والله لازم يصير هيك
لازم يتكرم أهل اللاعب بهيك ظروف وخصوصا إذا كان لاعب ممتاز ومخلص متل المحملجي
بس عنا للاسف ما بيصير هيك شي اسالوني انا كان ابن عمي بطل بالمصارعة الرومانية و توفى بعز شبابو وما حدى تذكرو ولا حدا كرمو او كرم اهلو ومالازم نستغرب لانو الاحياء عنا ما بيهتموا فيهم فكيف الاموات


للأسف في نادي الوحدة تحديدا" دون جميع الأندية يحارب أبن النادي وأبن الشام بالأخص وتكرار ذلك ليس صدفة بل متعمد والأمثلة كثيرة والمحملجي عندما غادر النادي كان بإمكانه العطاء وخروجه أحزن الكثيرين من جمهور النادي وقتها وهو المتواضع الوحيد الذي سلم قميصه للاعب آخر في مباراة إعتزاله من بين لاعبي الوحدة القدماء سلة وقدم فالباقي نظرتهم بأنهم ليس هناك مثيل لهم ولايستحق أحد أن يخلفهم بكل تكبر .

رحم الله أبو كاسم كنت مقيم في السعودية عندما كان مع فريق شباب سوريا بطل أسيا وكنت أفتخر به لأن نادي الوحدة أعطى لاعبا" بهذا المستوى للوطن .

ولايمكن أن أنسى الهدف الذي سجله على الفريق الياباني برأسه من على خط منطقة الجزاء .

الله يرحم محمود المحملجي أبو القاسم ويحسن إليه .

[ابو سطيف الوحداوي]

الله يرحمو
وشكرا للنكش

[محمود الصفدي]

الله يصبر قلب أمه وزوجته واولاده
اقسم بالله انا حالتهم صعبة جدا

[هنو]

لذلك اخ محمود الادارة عم تبيع كروت ليذهب ثمنها لاسرة الراحل لدى الكابتن لؤي طالب

[alrakia]

الله يرحموا ويصبر اهله