لسنا مكولكين وأعتقد أننا غير مقصرين

[هنو]

مرحبا ياشباب
مبارح نزلنا خبر بأنو فريقنا تعرض لخسارة أمام فريق الساحل بدورته الهامشية
بعض الأعضاء تقبل الموضوع وتفهم الغاية الأساسية من المشاركة
وبعضهم رأى بأننا مكولكين وغير شفافين
وبعضهم الآخر وجدنا مقصرين

طبعا لك منا وجهة نظره ونحن نحترمها
ولكن ....
نحن ذكرنا أن الغاية من الدورة هو
التجريب
انت برأيك مين بدو يجرب ؟
عمر خليل؟
رأفت؟
ماهر ؟
قصي ؟
غسان ؟
علايا ؟
عبد الناصر حسن ؟
خراط ؟
مين ؟؟؟؟؟
أليس من المفروض أن يجرب لاعبين جدد عليه؟
أم أنه سيجرب اللاعبين المعروفين ؟ وعندها سنقول : شو استفاد من الدورة ؟
جميعا يعلم أنه لو أراد لقب هذه الدورة لنالها ولكن دون أن يجرب أحد!!! وعندها تيتي تيتي
لاعبين الآن لايوجد فكل الاندية رتبت أوراقها في وقت كنا فيه متفرجين و متألمين و نحن نرى أفضل لاعبينا يرحلون عنا
وعندما عادت الأمور لنادينا
كان يلي ضرب ضرب ويلي هرب هرب
فجميع اللاعبين الستار وقعوا مع أندية مختلفة
فمن بقي من اللاعبين ؟
بقي فريق الموسم الماضي منقوصا
وبعض لاعبي الشباب
ولاعبي الدرجة الثانية
وبعض لاعبي دوري المحترفين


والدوري ع الابواب وتشكيلتنا حلوة عززناها بحراس ممتازين
رجعنا رأفت
رجع كل لاعبينا
وغير هيك النادي عم يفاوض أفضل اللاعبين بالدوري الاردني

سؤال
كيف بدك تنتقي لعيبة إذا ماجربتون؟
شو الشغلة شعيرة بعيرة ؟
طبعا أنا زعلت للخسارة بس لما خبرني الكابتن لؤي أنو التشكيلة مافيها حدا عرفت الغاية من المشاركة لأنو أبو حامد عم يجرب لعيبة شباب ولعيبة من الدرجة التانية ومعروف ابو حامد بحسن اختيارو واستكشافو للاعبين

هي بالنسبة للكولكة
أما بالنسبة للتقصير
فأين هو تقصيرنا بالضبط ؟
ألسنا أول من أكد خبر التعاقد من المحروس
أم نسيتم ؟؟
بعدين ع فكرة نحن أول مين جاب نتيجة مبارح ومو نسيانين نتيجة اليوم

وعذرا لأني ماعرفت أسماء تشكيلة مبارح لأني بالأصل ماعرفتون ويلي عرفتو ذكرت اسمو
وشكرا

[سعدي]

هنو
اول شي يعطيك العافية

تاني شي ما تعصب . .

الشباب معصبين مبارح لأنو خسرنا مع الساحل

طيب و وين المشكلة ؟؟؟
مو بدكن الفريق يتجرب ؟
معتضين انو نخسر مع الساحل . . طيب ليش ؟؟ ؟
في شي تار قديم بيننا و بين الساحل و مو حابين انو ناكل خسارة منهم ؟؟؟
و بعدين الكل فرح انو الادارة ما رح تتدخل بعمل المدرب
انا شايف انو الجمهور صار بدو يتدخل من أولها . .
الكابتن نزار شايف انو هالمشاركة بهالطريقة رح تفيده
و نحنا سلمناه الفريق و قلنالو . . معك صلاحية كاملة

منيجي عند اول لعبة منبلش بالنق ؟؟ و اللي ما نق صار اسمو مكولك .. عنجد جمهورنا أمرو غريب
مو ناقص غير انو الكابتن نزار قبل كل مباراة ودية تجريبية يعمل استفتاء للجمهور مع مين تنلعب و مين يتنزل بكل شوط . . بركي الجمهور بيرضى شوي . .


اما موضوع التقصير ما تاكل هم ابو الهن
بترك الكلام للاخبار و المواضيع اللي بالمنتدى تجاوب
انا صعب انو جاوب عن هالشي . ..

و يبقى ارضاء الناس غاية لا تدرك . .

[EmadAsfour]

اخي ابو كمال
مو ضروري
كل فهيم يحاكيك او يعاتب توجبه و ترد عليه

[Abu Waseem]

أبو كمال كلامك حلو وواضح وصحيح كل مين اله وجهة نظر ولكن دون القذف ورمي التهم

كلام سعدي وكلام هنو معقول كتير ومنطقي

[وحداوي موت]

هنو حبيبي ليش زعلان انت
اول شي كتر الله خيرك لانو نزلتلنا الخبر
تاني شي
يعني معقول الكابتن نزار
يبجب ماهر السيد والازهر والعزام ورافت ويقلن تعالوا بدي جربكن بلعبة الساحل
نحنا ما دخلنا هدا شغل الكابتن نزار
بعدين هنو انت ما في لاعب بلوحدة والا حافظ اسمو
ما قدرت تحفظ اسماء لعيبة مبارح لانو اغلبهن جداد ولعيبة شباب
بقا على شو عم يقولوا سوء تغطية
يلي بيقول هيك يتحفنا باخبارو وارائو واتصالاتو

[MOH@MAD]

كلمتين احسن من عشرة

يلي بجرب المجرب بكون عقلو مخرب ......

لازم نجرب الجداد من شان نعتمد على تشكيلة للموسم الجاية

[خيرو]

طول بالك هنو ..... مافي شي بيستاهل
هدول اللي حكوا أصلا مابيعرفا شي عن أصول كرة القدم
ولا يهمك ... كل شي الا زعللك

[HasSsaN]

لا تعصب هنو الكل بحكي وقت يعصب و الخسار عادية كل واحد الو وجهة نظر .....

انا من جهتي مابحكم الفريق وبقييمه ليبلش الدوري و نشوف المستوى بشكل عام

[هنو]

أنا لا معصب ولاشي
بس يلي بدو يحكي بتمنى يكون ملم بالأمور

[هشام المنجد]

روق ابو الهن كلامك مظبوط و الله يعطيك العافية و بشكرك عكل جهد انت و الشباب

[أغيد الفرا]

اي لا تعصب هنو .. لا مقصرين و لا شي

و الكابتن أبو حامد عم يجرب اللعيبة الجداد ليشوف مين خرج ياخد منهم .. أكيد مارح يلعب الفريق الأساسي مع الساحل

[اياد الوحداوي الشامي]

ههههههههههه عن جد ضحكتني على هيك رد لانو موضوعي كان غير هيك على كل حال بس وقت بدك ترد على شي موضوع رد علي بنفس الموضوع مو بغير شي

[أبو عامر]

اي شو صرلنا 5 شهر عمنحضر وخسرنا يعني فريق جديد ورديف كمان وخسر شو جنيت الدنيا يعني ما بدها كل هالشي ومافي داعي انك تبرر هاني اللي بدو يتقبل الخسارة يتقبلها واللي مابدو حرام يكون بيحب الرياضة من اصلها اي شو خسرنا دوري اما كأس كلها دورة ودية للوقوف على مستوى اللاعبين الجدد وبس

[وحداوي كتلوني]

زرعها بدئني ياهنو

والله العظيم معك حق بس شو بدك تحكي عوجة بحياتنا مامنصير

الله يعين أبو حامد على بعض الجماهير

[عمر نصري]

مشكور ابو الهن


ما ترد على حدا


و انت ما بدك شهادة من حدا


و و لا حدا من المشرفين مقصّر


بس الشي اللي بينحكا (( انو فريق جديد و فيه لاعبين عم تتجرب ما طلع فيون واحد يحط كول على فريق درجة تالتة ))


هي الفكرة فقط .....



مشكورين الجميع


و بالتوفيق للبرتقالي أ + ب

[M.S.M]

لا حول ولا قوة إلا با الله احسن شي

يلا عمنتسلى اسمو مافي اخبار

[ابوالعبدالشامي]

يا ابو الهن
معقول لهلاء ما بتعرف انو جمهورنا
مذبذب وما بيهمو الا النتيجة وبس
لو كانت دورة للمعتزلين

[هنو]

انا مالي معصب

بالعكس انا بقمة الروقان

و كل الاعضاء حبايبي

ما اصلاً نحن عم نتصل و نحكي مع هاد و هاد مشان شو ؟

و الله مشان الكل يدعيلنا

و لأنو متل ما نحن منحب النادي الكل بيحبو و مافي حدا بيحب النادي أكتر من التاني

كلنا هون دمنا برتقالي

و الله حيو الوحداوية


تعو احكيلكون هالقصة

بزمناتي كنت عم احضر لعبة للوحدة كنت صف تامن رحت اعدت بالمنصة

و اذ بيجي واحد بلز عليي و بيحط رفيقو نص ع رجلو و نص ع رجلي

قمت انا صرفتلو ربع و اتخانأت انا و رفقاتو

و كنت معصب لانو كنا خسرانيين مع الاتحاد 1-0 و هنن كمان كانوا معصبين

رجع تحيون و أعد ع رجلي

قمت انا بكل حنية ادحتو رفسة و رجعنا تخانقنا

و ايجو الشباب يلي حولينا و حلوها و أعد الافندي ارفصة عند رفيقو

و بعد شي 10 دقايق فات كول للوحدة قمنا كالعادة نطينا و ما حطينا

و ما بلاقيلك غير صار بوشي و عم ينط رحت عليه سلختو بوسة و اتعانقنا و نطينا

و لما هدينا حلفت يمين انو ما يعد غير ع رجلي طوال اللعبة


و السبب انو وحداوي و انو لما حطينا التاني دمعت عيونو من الفرح








الخلاصة: القلب يحوى كل من قال انا وحدواي

[وحداوي موت]

الخلاصة: القلب يحوى كل من قال انا وحدواي[/quote]


اصلي هنو اصلي والله

[ابو باسل]

ياجماعة : نزار سيكون المسبب في تدمير النادي بعد سنتان واللي بيعيش بشوف.
وين القواعد ؟؟؟؟؟؟؟؟
لقد أمر دونكا العرب ابو حامد بتدميرهم........ واسألوا لتعرفوا

[max alwahdawi1]

والله حط با الخرج

[ابو وسام]

اول الشي الله يعطيك العافية اخي هنو .
تاني شي خلينا نخسر هلا ونجرب كل اللعيبة احسن ما نخسر بالدوري , بعدين بدي افهم شو مين افهم من الملك نزار حروس هو بيعرف شغلو ولاحدا يحكم من عندو هلا بس يخلص كلشي ساعتها كل واحد بيحقلو يحكي وتركونا من كل هالحكي وخلونا نوقف مع نادينا

[محمد اشرق لبن]

انشالله بيتحقق كل حلم وحداوي

[salah]

ياجماعة : نزار سيكون المسبب في تدمير النادي بعد سنتان واللي بيعيش بشوف.
وين القواعد ؟؟؟؟؟؟؟؟
لقد أمر دونكا العرب ابو حامد بتدميرهم........ واسألوا لتعرفوا

بالله عليك أنت مو شي عضو بالنادي تضرر من مجيء أبو حامد ؟؟؟
يعني أول مشاركة ألك و ماعم تعرف شو تحكي !!!!
أبو حامد الله يعطيه العافية أستلم الفريق من أسبوع و ماعنده فريق لسه و عم تسألوا عن القواعد !!!!!عود أعوج و حكي عدل

[صاحب]

ياجماعة : نزار سيكون المسبب في تدمير النادي بعد سنتان واللي بيعيش بشوف.
وين القواعد ؟؟؟؟؟؟؟؟
لقد أمر دونكا العرب ابو حامد بتدميرهم........ واسألوا لتعرفوا

والله انت متضرر ياالك ولد بالشباب ماضمواللفريق ياانت كنت مدرب للشباب وخايف ينقال على عملك انو فاشل ياانت من مدربي القواعد اللي اتعيشوا عالنادي وما طالعوا ولا فلتة لك مافي ولا لاعب بالشباب خرج يكون ناشئين لك شاف الشباب ماصفي حدا من كوادر اللعبة ماقللوا ولا لاعب من الشباب خرج يكون بالفريق
ياكنت بكوادر النادي المتعيشة وماعادلك دور ياانت من جماعة وتيارات يللي بهالثلاث سنوات استلموا النادي وخرب من تكتيكهم ولك ياعمي كل مين بينقلوا باسموا وتاريخوا وعملوانزار شفنا من 8سنين شوعمل بالنادي وترك فريق خدم النادي 10سنوات وشفنا يللي استلموابعده كم سنة فريقهم خدم النادي اول وتاني سنة كان خالص الفريق بالله عليكم يامشرفين ويااعضاء كلامي صح والا لا

[وحداوي كتلوني]

يعني ياسيد أبو باسل اللي بيسمعك عم تحكي عل القواعد بيفكرنا عم نجيب بطولة الأشبال و الناشئين والشباب مالحال ألعن من بعضو بعدين الكابتن صرلو أسبوع مستلم

رب العالمين بعزتو وجلالتو خلق الدنيا بسبع أيام (وهو قادر على خلقها بثانية )
لكن رب العالمين بيعلم البني آدم أنو البناء شوي شوي ما بيخلص بيوم وليلة والكابتن ما عندو عصى سحرية الكابتن فضل ناديه الأم عن عروض تانية دسمة والكل بيعرف هالحكي أنا وحداوي أصيل وما بحكي غير الحق لا تطالبو الكابتن بشي بدو سنين يعملو بأسبوعين

بعدين ياسيدي الفهمان ماأظنك أفهم من الكابتن
ولاأظنك وحداوي

أنت واحد مدسوس والمدسوس بيدوسو المحروس

[Abu Waseem]

ياجماعة : نزار سيكون المسبب في تدمير النادي بعد سنتان واللي بيعيش بشوف.
وين القواعد ؟؟؟؟؟؟؟؟
لقد أمر دونكا العرب ابو حامد بتدميرهم........ واسألوا لتعرفوا
بركاتك يا شيخ
بس كذب المنجمون ولو صدقو مو شباب؟

[وحداوي موت]

لقد أمر دونكا العرب ابو حامد بتدميرهم........ واسألوا لتعرفوا[/quote]

يا فهمان يا ريت وقت بدك تجيب سيرة الملك على لساتك
تحكي باحترام
ولا بتحب نجي نعلمك كيف الاحترام

[سعدي]

ياجماعة : نزار سيكون المسبب في تدمير النادي بعد سنتان واللي بيعيش بشوف.
وين القواعد ؟؟؟؟؟؟؟؟
لقد أمر دونكا العرب ابو حامد بتدميرهم........ واسألوا لتعرفوا

لك دخيل القواعد اللي كانت عم تقتل بعضها قبل مجيئ نزار ..
معلومك بشار شريف كان يخرجلنا كل موسم شي سبطعشر لاعب بكل مركز
حتى النايد كان يحتار وين بدو يروح فيهن . . و بلشنا نعمل اعارات للفرق الاوروبية من قواعدنا

بس هلأ على زمن نزار رح يختفوا القواعد .. .

لك مشان الله من وين جايينا انت ؟؟
روح اتضبضب الله يرضى عليك . ..
و كن على وجعك
نتمنى لك حظا اوفر في مشاركات أخرى . .

[هنو]

ياجماعة : نزار سيكون المسبب في تدمير النادي بعد سنتان واللي بيعيش بشوف.
وين القواعد ؟؟؟؟؟؟؟؟
لقد أمر دونكا العرب ابو حامد بتدميرهم........ واسألوا لتعرفوا

شفنا سيدي شفنا

شفنا مين كان ح يدمر النادي

أنت أكيد آصد أبو حامد ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يعني كل الوحداوي ما بيفهوا و انت بس يلي الله طعمك الفهم ؟؟؟؟؟؟؟؟؟؟؟؟؟؟؟؟؟؟