ســــوريـــــا × كوريا الشمالية

[برتقالي للعظم]

بعد نصف ساعة من الآن
وعندما تقرع الساعة أجراسها لتعلن الحادية عشرة صباحا بتوقيت دمشق
سنكون على موعد مع افتتاح بطولة آسيا للناشئين 2010

وسيكون على مسرح المباراة الافتتاحية

ســــوريـــــا × كوريا الشمالية

دعواتنا لمنتخبنا بالفوز والأداء الطيب

ويلي عم يشوف المباراة لا يبخل علينا بالنقل

[khaldoun-sy]

سوريا تتقدم 1-0 بهدف الوحداوي عمر خيربين، نشالله كون كتبت الكنية صح

[khaldoun-sy]

الهدف بالدقيقة 9، المباراة منقولة على الجزيرة 2 بس للأسف ما عم شوف
المباراة. عم تابع اللعبة على موقع كوورة

[برتقالي للعظم]

13 دقيقة على البداية

سوريا 1-0 كوريا الشمالية


===========
سوء تفاهم على الكرة بين لاعبين من سوريا وإصابه رأس أحدهما برأس الآخر

============

رابط للمباراة بصوت جوزيف بشور
http://aya.sy/services/broadcasting/tv.swf (http://aya.sy/services/broadcasting/tv.swf)
=================

فرصة خطيرة للكوريين

[khaldoun-sy]

http://aya.sy/services/broadcasting/tv.swf (http://aya.sy/services/broadcasting/tv.swf)
=================



شكراً على الرابط

[برتقالي للعظم]

ضغط كوري متواصل
وسوء تقدير من حارسنا يمنحهم ركلة ركنية

[برتقالي للعظم]

خطيرة لمنتخبنا مقطوعة من الدفاع الكوري ومرتدة كورية والحارس ينقذها ببراعة

[برتقالي للعظم]

http://aya.sy/services/broadcasting/tv.swf (http://aya.sy/services/broadcasting/tv.swf)
=================



شكراً على الرابط

أهلين بالحبيب

[برتقالي للعظم]

42 دقيقة على البداية ولا جديد


سوريا 1-0 كوريا الشمالية

[khaldoun-sy]

لعمة 5 دقايق وقت بدل ضائع بالشوط الأول

[برتقالي للعظم]

5 دقائق وقت بدل ضائع

[برتقالي للعظم]

انتهاء الشوط الأول



سوريا 1-0 كوريا الشمالية

الله يسترنا بالشوط التاني
بصراحة أداء فريقنا كان عادي والفرص قليلة والخطيرة منها مقطوعة

عدم تناغم بين اللاعبين وسوء التفاهم في أكتر من كرة سبب أحراجات للدفاع والحارس منها ركنية بلاطعمة من سوء تقدير للحارس وإصابة أحد لاعبينا في رأسه برأس لاعب آخر

منتخبنا بحاجة لإعادة ترتيب أوراقة لكي نخرج بنتيجة طيبة
المنتخب الكوري ليس بعبع ويمكن الفوز عليه بسهولة

[وحداوي انا]

مشكورين شباب على النقل

و بالتوفيق لسوريا

[Orange Blood]

ممتاز

اذا بيجيبوا اللعبة بياخدوا دفعة معنوية كتير كبيرة

[برتقالي للعظم]

هدف التعادل


سوريا 1-1 كوريا الشمالية

[وحداوي انا]

:sad: :sad: :sad:

معليش شو صار سوريا متل النار


:syr:syr:syr:syr:syr:syr

[برتقالي للعظم]

المنتخب الكوري فاتح شوارع بدفاع منتخبنا وضاعت فرصة الهدف التاني لكوريا

الله يجيرنا قولوا آمين

[برتقالي للعظم]

انفرادة وضاعت فرصة الهدف التاني



لكوريا :b(

[برتقالي للعظم]

عدة مراوغات بلا طعمة لمهاجمنا والكرة تضيع بين أقدام الدفاع الكوري

[khaldoun-sy]

يا شباب كرة القدم بكوريا الشمالية تطورت كتير، لك ايمتى كنا نسمع فيهم على مدار 20 سنة مضوا ؟؟؟

ياه وين صرنا بين الخلق والبشر ...

كوريا الشمالية تعذب البرازيل بنهائيات كأس العالم
كوريا الشمالية تفوز بكأس آسيا للشباب بكرة القدم

وما بتعرفوا شو بتساوي هلأ بكأس آسيا للناشئين ؟؟

[برتقالي للعظم]

فرررصة خطيرة لمنتخبنا وكاد يكون هدف الترجيح

[وحداوي انا]

سوريا



سوريا



سوريا

[برتقالي للعظم]

انفرررررادة لمنتخبنا خطيرة والمرمى خالي
لكن الاحتفاظ الزايد بالكرة خلى المدافعين يرجعوا ويصدوا الكرة بدل الحارس

:sad: :sad: :sad:

[برتقالي للعظم]

قسما بالله حرااااااااااام تضيع

فرصة رح يندم عليها منتخبنا كتير

[khaldoun-sy]

شو صار وين راحت الصورة ؟؟

[Orange Blood]

يعطيكون العافية

خاااااااااااااالصة

[وحداوي انا]

انشالله الهدف جاية

اول الله سوريا

اول الله سوريا

:chee2:chee2

[برتقالي للعظم]

انتهاء المباراة بالتعادل 1-1

قلتلكن فرصة رح يندم عليها منتخبنا كتير

مهاجم منتخبنا ح.... ح.... ح....

[برتقالي للعظم]

هلأ عم شوف هدف التعادل لكوريا
والله حرام
رقابة دفاعية خالصة ودفاع مشتت والحارس عم يتفرج عالطابة وهية عم تفوت عالغول

الله يسترنا من لعبة ايران

[وحداوي انا]

بالتوفيق لسوريا في باقي المباريات

مشكور برتقالي للعظم على النقل

و الله يعطيك الف عافية

[برتقالي للعظم]

الله يعافيك يارب
هاد واجبي

بس ما بعرف لإيمتى بدنا نقول هالكليشة " هاردلك " والله العظيم تكركبت من جوا

[khaldoun-sy]

خسارة :sad::sad::sad:

[انا دمي برتقالي]

المباراة جيدة عموماً ومنتخبنا جيد وفي على وشه ضو وبيطلع بإيده ينافس... ومبروك النقطة كبداية مو سيئة...

ولولا الحارس السوري الرائع اليوم كنا تبهدلنا...

أما مشكلتنا فدائماً عم تكون بالمدرب والتكتيك لي بيختاره للمباراة... لعاب برأس حربة واحد وعالمرتدات والباصات الطويلة لي انقرضت مع الديناصورات، مع أنه لو بيضغط منتخبنا كان أحسنله وشفنا أنو منتخبنا بيقدر يضغط ويخترق الجزاء وعنا لعيبة ممتازين ووقت عم يضغط ويحاصر المنتخب الكوري بمنطقة جزاؤه عم يكركبه هوي وحارسه المفشكل... وأول عشر دقايق بالمباراة سورية بالكامل وكنا رح نجيب فيها غوول تاني... بس تكتيك المدرب والرجوع للدفاع روح المباراة من إيدنا.... غريب لإيمتى بدنا نبقى جبناء بالهجوم ونلعب دفاع؟؟؟

يعني لإيمتى بدنا نخلص من هالعقلية السورية تبع مهاجم واحد وإلا ما تظبط معه شي هجمة؟؟؟ لإيمتا؟

مهاجمنا الأشقراني لي ما حفظت اسمه عنده مهارت وترقيص بس ما بيشتغل لهالتكتيك... لأنه صحي مهاري بيرقص إيه بس بطيء بالجري وجسمه ضعيف إدام عمالقة كوريا لي ضبعوه وضيعيوه وما لبكهن بنوب بالمباراة... الدفاع الكوري إدامه مبينين أخواته الكبار...

بدنا مهاجم يكون قوي متل اللاعب لي فات بآخر خمس دقايق... أطول وأسرع ومبين رشيق ومن أول لمسة إله اخترق وجاب عارضة...

عموما نحنا ضوعنا المباراة من إيدينا بالتكتيك الفاشل وبالتسرع تبع لعيبتنا بآخر عشر دقايق... كبينا تلت فرص متل الذهب للتسجيل. كنا دبحناهون للكوريين بهالوقت..

وبالتوفيق لسورية بقادم المباريات

[برتقالي للعظم]

المباراة جيدة عموماً ومنتخبنا جيد وفي على وشه ضو وبيطلع بإيده ينافس... ومبروك النقطة كبداية مو سيئة...

ولولا الحارس السوري الرائع اليوم كنا تبهدلنا...


معلم بدي اعرف شلون ركبوا هالجملتين مع بعضن بآن معاً ؟
أنا يلي شفتوا بان المنتخب لسا بدو شغل كتير متل ما قلت حضرتك لازمنا مهاجم سوبر والهجوم يكون برأسي حربة مو بمهاجم واحد ومطلوب منه كل شي
الانفرادة يلي راحت رح نضل نحكي فيها لآخر البطولة حتى بس ليرجعوا عالشام

لك اذا قدام كوريا وحارسن المفشكل متل مالك عم تقول وهيك صار شو بدنا نعمل قدام ايران ؟؟؟ نحنا خلقة بس نسمع باسم ايران منرجف قصب ......


يلا متل العادة "هاردلك" وبالتوفيق بباقي المباريات

[انا دمي برتقالي]

معلم بدي اعرف شلون ركبوا هالجملتين مع بعضن بآن معاً ؟



عفواً، بس كلامي صحيح ومنطقي 100% وما في تناقض بين الجملتين... والجملتين مالون علاقة ببعض...! كل وحدة عم بحكي فيها عن شغلة...

يعني ببساطة عم عدد نقاط المنتخب الإيجابية ونقاطه السلبية... وعم قوول إنه فريقنا ماشي حاله وبيطلع بإيده ينافس (في بالمنتخب نقاط إيجابية كتيرة ما ذكرتها بمشاركتي السابقة، ومنها: الدفاع بدءً من جزاء الخصم، الضغط على حامل الكرة واستخلاصها منه، الباصات الحلوة، السرعة والقتال عالكرة، البنية الجسمانية المعقولة، باستثناء رأس الحربة لي ما كان مناسب بموقعه اليوم)... يعني حكيت شو نقاط الضعف وشو نقاط القوة... ووحدة من نقاط قوتنا المميزة هي الحارس... وتعرض منتخبنا لتسديدات خطيرة من المنتخب الكوري وتألق حارسنا بردها مو معناها منتخبنا كان سيء بالمباراة ولا معناها كانوا الكوريين متسيدين اللعبة... لاء، بس أكتر ما هنالك صحلون تسديدتين وانفرادة وتألق حارسنا عطريقة فاندرسار بإنقاذون... فوين المشكلة... (يعني لولا تألق كاسياس إدام روبن بالمباراة النهائية ما كانت فازت إسبانيا بالمباراة... صح؟ طب هل هادا معناته إنو إسبانيا كانت سيئة بالمباراة؟) لاء...! إيه وهي متلها.... بلا تشبيه.

يعني باختصار قصدي منتخبنا بيطلع بإيده ينافس وبيطلع بإيده يكون أفضل من هيك. مستوانا مو سيء... وبكرا ببان أكتر على حقيقته عالمغتسل إدام إيران العنيفة ويلي فازت اليوم على عمان 5-1 مع الرأفة...

واليوم الهدف المبكر لي سجلناه بأول خمس دقايق هوي لي ضرنا بدال ما يفيدنا... لأنه من وقت كان عمري سبع سنين بسمع إنو سورية بتضغط أول عشر دقايق بتجيب كوول وبتنام... واليوم ناشئينا ما خالفوا سياسة آبائون بنوب والحمدلله... على خطى الأجداد واثقون... حط غوول ورجاع دفاع... وتعرض لهجمات خطرة هيييييييك لتاكل غوول بآخر ربع ساعة وساعتها ركوض وما تلحق... وتماماً هيك صار فينا اليوم... ضغطنا أول عشر دقايق وكركبنا الكوريين وتفائلنا بهالمنتخب وقلنا هاه، يا هيك فريق هجومي يا بلاه... ضغنا وهجمنا وجبنا غوول سريع بأول خمس دقايق و و و و و و... نمنا... نمنا نومة أهل الكهف..! وبعد ما أكلنا غوول التعادل بالدقيقة 65 تقريباً بلش فريقنا يرجع للهجوم ويتحرك ليعوض التعادل، وفعلاً كنا على وشك نرجع السكور لصالحنا...
وبآخر عشر دقايق فقط روحنا على حالنا تلت أهداف شبه محققين... وللا نسيان السيناريو والإنفرادة والعارضة وهل كم هجمة يلي صاروا بآخر وقت؟؟؟؟

بكل الأحوال أنا حرمت اتفائل بمنتخباتنا... بس عم بنقل شو شفت اليوم وعم بنقل رأيي بالمنتخب... آخر شي هادا منتخبنا مو منتخب الجيران.

[انا دمي برتقالي]

لك اذا قدام كوريا وحارسن المفشكل متل مالك عم تقول وهيك صار شو بدنا نعمل قدام ايران ؟؟؟ نحنا خلقة بس نسمع باسم ايران منرجف قصب ......


على فكرة آسيا كلها بس تسمع باسم إيران بترتعب... إيران عم تخطط وتبني صح عمستوى الرياضة... لك مو بس رياضة... جيش وسلاح واقتصاد وصناعة وطنية وتناحة وسياسة وكبر راس ومنتخبات رياضية... فليش لحتى ما نرتعب منها بالفطبول؟؟؟؟

وإذا ما فزنا على عمان انسى غرامك راح... مباراة إيران ان شالله يحنوا علينا (الأشقاء) الإيرانيين ويساعدونا ونتعادل...