خسارة منتخبنا الشاب أمام التنين الصيني بكأس آسيا للشباب

[طارق الغبرا]

خسر صباح اليوم منتخبنا الشاب بمباراته الثانية بالبطولة الأسيوية
أمام منتخب الصين مستضيف البطولة
2-0
الفريق جيد و متل العادة بكرا بيرفرف بعد البطولة

وخير الكلام
هاردلك و تعودنا
و يلا سرية حط حجج

[noel]

الاداء اليوم رائع من منتخبنا و النتيجة غير عادلة ابدا

[W@SEEM]

اليوم منتخبنا كان أفضل أداءاً من المبارة الأولى يلي فزناها

لعب جيد وإنتشار ممتاز وثقة بالنفس

بس الصين سجلت مبكراً بالدقيقة 5

وسجلت الهدف التاني بالدقيقة 93

هارد لك لمنتخبنا وإن شاء الله بيفوزا بالمبارة التالتة على السعودية

وإن شاء الله السعودية اليوم تخسر مع تايلند

[wassim80]

وإن شاء الله السعودية اليوم تخسر مع تايلند



ايه والله هلق أنا معك , بالتمني لخسارة السعودية
لأنه الشغلة وصلت لمصلحة منتخبنا :twisted:


مو مشكلة أنا ماشفت بس سمعت أنه منتخبنا كان ممتاز, الله يوفقهم ويفوزو بالأخيرة ويتأهلوا للدور التاني:chee1

[برتقالي للعظم]

آآآآآآآآآآمين يا رب العالمين

بس شو قصة البطاقات الحمر
هي مباراتين ورا بعض

[سعيد بيازيد]

مافي أداء ومافي خطة كل العالم عم تتقدم ولحنا عم نرجع لورا
مدربين خالصين ولأعبين موهبين والنتيجة خسرانين:cry::cry::cry:

[W@SEEM]

http://www.syrianow.sy/archive/news/n1286267820.jpg

خسر منتخبنا الوطني للشباب أمام نظيره الصيني بهدفين دون مقابل الثلاثاء في ثاني مبارياته ضمن منافسات المجموعة الأولى لنهائيات كأس آسيا للشباب المقامة في مدينة زيبو الصينية .

وفاجأ المنتخب الصيني منتخبنا بهدف مبكر بعد أن تابع جين جينغداو برأسية ذكية ركلة ركنية في الشباك ( الدقيقة 4 ) .

وسدد أديب عيسى كرة صاروخية من ضربة حرة مباشرة من مسافة بعيدة مسحت العارضة ( د 13 ) .
وأنقذ إبراهيم عالمة كرة رأسية خطيرة للصين من كرة ثابتة وحولها لركنية ( د 14 ) .
وشكلت الهجمات المرتدة والضربات الثابتة لأصحاب الأرض خطورة مستمرة على مرمى منتخبنا .
وسدد محمد باش بيوك كرة أرضية من خارج منطقة الجزاء مرت جانبية ( د 24 ) .
وطالب لاعبو منتخبنا بركلة جزاء بعد سقوط نصوح نكدلي داخل منطقة الجزاء لكن الحكم أشار إلى مواصلة اللعب ( د 29 ) .
ونال طه جنيد بطاقة صفراء بعد تدخل عنيف على أحد لاعبي الصين ( د 33 ) .
ووصلت كرة ليي هانغ غير المراقب من على بعد أمتار من المرمى ، سددها بقوة حولها عالمة لركنية ( د 45+1 ) .
وبدأ المنتخب الصيني الشوط الثاني بقوة فانفرد كسي زهانغ من الناحية اليسار وسدد كرة قوية تألق عالمة في إبعادها لركنية ( د 48 ) .
وحاول تان استغلال خروج خاطئ للحارس بعد كرة عرضية فتابعها برأسه لترتد من قدم أحد المدافعين وبطن العارضة قبل أن يسيطر عليها الحارس ( د 50 ) .
وتواجد منتخبنا للمرة الأولى في الشوط الثاني من تسديدة قوية لرضوان قلعجي حولها الحارس الصيني بصعوبة لركنية ( د 60 ) .
وعاد المهاجم الصيني تان ليهدد مرمى المنتخب برأسية جديدة تمكن الحارس من إبطال مفعولها وتحويلها لركنية ( د 64 ) .
وأشرك كيفورك مردكيان أحمد خضور مكان محمد باش بيوك ( د 67 ) .
واستقبل أسعد الخضر كرة من محمود مواس بصدره داخل الجزاء وتابعها ضعيفة جانب المرمى ( د 68 ) .
وتابع طه جنيد كرة عرضية بصدره من على خط الـ6 أمتار سيطر عليها الحارس ( د 72 ) .
وزج مردكيان أحمد الأسعد مكان نصوح نكدلي لتنشيط خط الهجوم ( د 73 ) .
ونفذ الأسعد ضربة حرة مباشرة من الجهة اليمنى أبعدها الحارس الصيني ( د 78 ) .
وأشهر الحكم البطاقة الصفراء الثانية بوجه طه جنيد بعد ركله للاعب صيني بدلا من الكرة ليخرج بالبطاقة الحمراء ( د 81 ) .
ونال أسعد الخضر بطاقة صفراء لاعتراضه على التحكيم ( د 83 ) .
وأضاف جينغداو الهدف الثاني له ولفريقه بعد هجمة صينية مرتدة ردها عالمة في المرة الأولى وتابعها جينغداو في المرمى الخالي ( د 90 + 4 ) .

[MOH@MAD]

هارد لك خسارة منتخبنا ...

وهاد دليل لتراجع مستوى الشباب عن الفريق السابق :evil:

[انا دمي برتقالي]

الاداء اليوم رائع من منتخبنا و النتيجة غير عادلة ابدا

منتخبنا جيد جداً وما بينخاف عليه....
وعنجد حبيتون وانبسطت باللعبة رغم انه خسرنا
و واللهي زعلت عليون... ما بيستاهلوا الخسارة...


الهدف الصيني الأول غدر وعالسريع ولسه ما فاتوا لعيبتنا بالجو... والهدف التاني بالثواني الأخيرة من هجمة مرتدة...

الصين لعبت دفاع من الدقيقة الرابعة بالمباراة وعالهجمات المرتدة والخطيرة جداً... والصينيين مو سريعين ولا شوي...

ومن جديد منتخبنا بيكمل المباراة بعشر لعيبة... قضاء وقدر.

مشاكل منتخبنا:

واحد: ناقصه التسديد على المرمى... شفنا إنه الشباب جيدين جداً بالتسديد فليش مو مفعلين هي الميزة... تسديداتون قوية ومركزة... بس قليييييييييييييييييييييييييلة....

تنين: تمريرات كتيرة وتدوير طابة عالفاضي: إدام جزاء الخصم عم يكتروا مراوغات وترقيص وتمريرات وتمريرات وتمريرات طيب وبعدين... يمرروا لداخل المنطقة... يهجموا لداخل المنطقة...
عم يلعبوا على مبدأ الباص المضمون... وهاد الشي مو كتير مهم إدام الجزاء.

يعني مختصر مفيد مشكلتنا بالهجوم... لهلئ ما عرفنا مين رأس الرعب بمنتخبنا... في امتلاك شبه كامل للكرة وفي هجمات ومحاصرة بس الهداف غايب والتسديد باتجاه المرمى قليل.


مزايا منتخبنا:

واحد: وسطنا جيد جداً...

تنين: دفاعنا جيد نوعاً ما... يعني ماشي حاله... في تركيز وهدوء عالخصم، وإخراج الطابة عم يكون بتمريرات ذكية وهادئة باتجاه وسط الملعب وليس على مبدأ شلف تربح.

تلاتة: القدرة على امتلاك الكرة وعمل التمريرات السريعة من قبل المنتخب كفريق جماعي... امتلكنا الكرة طوال المباراة أكتر من الصينيين وامتلكنا وسط الملعب بشكل جيد جداً.. ولولا هدف الصين المبكر ، من جديد بقول ، كان ممكن يكون للتكتيك والنتيجة كلام تاني... الصين من الدقيقة الرابعة لعبت دفاع وارتاحت، وعايشين عالهجمات المرتدة... والصينميين مو سريعين ولا شوي... وعلى فكرة هيك ربحوا عالسعودية... كرات عالية وهجمات مرتدة صاروخية.

أربعة: المهارات الفردية عالية بشكل ملفت للنظر عند أغلب لاعبينا. بالإضافة لثقتون بنفسون. وهي نقطة مهمة كتير.

خمسة: الحارس جيد وصحيان.

ستة: في ضغط قوي من قبل لاعبينا على حامل الكرة وهادا شي يحسب لهم كمان... وعموماً انتباهون عالي.

سبعة: وهي أهم نقطة، أنو لاعبينا كلون ودون استثناء عم ياقتلوا عالطابة وبشكل قوي وجدي... يعني مو نعيانين متل لاعبي منتخب الرجال. يعني عم يلعبوا من قلب ورب وبيشدوك تشجعون وتجي معهون. لذلك بس بتوقع ناقصون يجربوا حظون أكتر بموضوع الهجوم وما يترددوا.

مختصر مفيد ناقصنا التهديف واختراق الجزاء بأي طريقة وعدم الاكتفاء بمحاصرة الخصم من خارج جزاءه.


:syr...وبالتوفيق لنسور قاسيون...:syr

[انا دمي برتقالي]

هارد لك خسارة منتخبنا ...

وهاد دليل لتراجع مستوى الشباب عن الفريق السابق :evil:


أنو فريق شباب سابق؟؟؟؟

حبيب... ببطولة آسيا السابقة للشباب ويلي صارت بالسعودية خسرنا مباريات الدور الأول كلها وطلعنا من البطولة آكلين غووال عن سنتين...

خسرنا مع كوريا الشمالية مدري أديش

وخسرنا مع الإمارات لي فازت باللقب 3-1

وخسرنا مع العراق 2-1 وكشتحنا بدون ما حدى يقلنا مع السلامة.


عموماً هالمنتخب بس ناقصه التهديف... وما بعرف شو الحل، بس من المفروض بهيك شويطة بالمنتخب، من المفروض نشوف عشر تسديدات عالمرمى أقل شي بكل مباراة... ما بعرف ليش عم يرحموا الخصم ويدوروا الطابة أكتر من اللازم...

ناقصون لاعب سلال متل إينيستا فجأة يلاقيه الحارس بحضنه.

[انا دمي برتقالي]

مافي أداء ومافي خطة كل العالم عم تتقدم ولحنا عم نرجع لورا
مدربين خالصين ولأعبين موهبين والنتيجة خسرانين:cry::cry::cry:


طول بالك علينا حبيب...

بيربح المنتخب منساويه بطل العالم... بيخسر منساويه أفشل فريق بالدنيا...

شبكون؟؟ طولوا بالكون شوي...

المنتخب جيد والمباريتين انفرض عليه ظروف صعبة... الأولى انطرد لاعب ظلم من نص الشوط الأول... وبالمباراة التانية أكلنا غوول غدر من ركنية مفشكلة بأول أربع دئايئ...

طوال المباراة اليوم فريقنا كان الأفضل، بس الصين كانت أخطر بالمرتدات فقط... ولا تنسى إنو الصين مجهزين حالون للبطولة لي صايرة على أرضون وبين جمهورن.. يعني مجهزين حالون منيح منيح وحاطين عينن عاللقب وكابين مصاري بلاوي كرمال هالشغلة، ورغم هيك منتخبنا لعب بالمباراة أفضل منن بشكل ماشي حاله... بس كان ناقصنا لمسة التسجيل فقط.

وبالتوفيق لمنتخب سورية بكل الأحوال.

[fadi al whdawi]

نتيجة غير عادلة ابداااااااااااااااا :cry::sad:منتخب رائع ابطل جميع هجمات المنتخب الشاب الصيني بس في بعض المشاكل بالهجوم بالتوفيق امام السعودية و نشاء الله مو بس الدور الثاني نشاء الله على النهائي:)):smile:

[ابو وسام]

بعد المستوى المميز لمنتخبنا ..حتى ولو خسرنا مابزعل
لانو ربحنا فريق قوي والواحد بيتفأل فيه

[نستول]

اخ بس لو كان هالمنتب محضر متل العالم والخلق كنا شفنا نتائج احسن من هيك لانو اللعيبة موهبين بس ضعف خبرتهون كان واضح جدا وهاد مردود لقلة المباريات التحضيرية يلي لعبوها

[رامي الوحداوي]

هاردلك لمنتخبنا

[وحداوي انا]

هارد لك لفريق الشباب

و لازم يربحوا

على السعودية باذن الله

[RvH]

بظن الكاد الفني بيتحمل مسؤولية الخسارة و من قبلو اتحادنا العقيم

[SH@@MI]

هارد لك وانشالله منربح عسعودية ومنتأهل للدور التاني
مو كتير صعبة

بس لو ما أكلنا الغول التاني اليوم
كان التعادل بكفينا مع سعودية