مجرد رأي

[وحداوي كاسر]

احلى مسا على كل الوحداوية

كل عام جميع أمتنا الاسلامية بألف خير

الحمد لله بعد ماستقر وضع النادي مع ادارة القوطرش وبعد ماشفنا الأستعداد المثالي لفريق كرة القدمعندي كلمتين وبتمنا يلاقو اذن صاغية من الادارة


الحقيقة جمهور الوحدة من أحسن الجماهير بالوطن العربيبس بالسنتين الماضيين صار الوضع سيء

يعني صارت الروحة على الملعب بتعكر الدم

أنا عندي ولد وبنت ومشجعين لنادي الوحدةوالولد عمره 12 سنة ولما بيروح على الملعب لازم سدلو أذانه مشان مايسمع الموشحات اللي كلنا بنعرفا وللأسف أنو بعض من أعضاء الرابطة بيرددوها مع الجمهور

يا أخوان بتمنى من الأدارة متل ما تابعت امور الفريق تتابع أمور المدرجات لانو صار الواحد يخجل ياخد ولادوا على الملعب
وشكرا

[noel]

و انا معك وقت تابع لمباراة بكتم الصوت كرمال الكلام الحلو يلي بقولوا بعض الطايشين من جمهورنا
الشغلة صار بدها حل

[ميمو الرايق]

للأسف مافي حل .....
لأنو انت عم تتعامل مع جمهور كامل يعني شرائح مختلفة من الشام ..... وبكلمة وحدة ممكن تشتعل الشغلة .....
وعلى فكرة مو بس جمهورنا بيحكي كلام سيء .... كل جماهير الأندية السورية بتعمل هيك .. حتى جمهور الكرامة اللي كانو يقولو عنو جمهور حمص الطيب صار أضرب ...
انا ماني عم برر الشي اللي عما يصير .. بالعكس تماما انا من أشد الناس تعصّبا ضد هالموضوع ... بكل مباراة بكون جاي وحميان مشان شجّع على أمل انو مافي شتائم بقوم ما بلاقي حالي الا هربت من المنصة الرئيسية ورحت لتحت الصورة مشان ما اسمع هيك شي .....
اسف ع اللعي الزايد مني .. بس عنجد هالظاهرة ما قلها حل ....
أو بالأحرى في حل واحد .... انو الفريق يفوز ويأقنع و يمتع .... متل ما شفنا بمباراة الـ 5-2 مع جبلة هالسنة ... ما صار فيها ولا مسبّة ......

[ابوالعبد الوحداوي]

عنا كل واحد محترم في مئابيلو تنين عالأقل أوسخ من الوسخة .... :crdr
فمشان هيك ما بظن انو بتئدر ادارة القوطرش تفوت عبيوت اللي بيجوا عالملعب وتربيون من اول وجديد

[عمرالزهر]

انشاء الله بهمة الاعضاء والشباب بالادارة سيكون هناك حل

[SH@@MI]

صعب كتيييير

ممكن حل للشتائم الجماعية
مو من الادارة من اتحاد الكرة
يعني كل شتيمة جماعية للاعب أوم حكم ممكن تحرم الجمهور لعبة

اما الشتائم الفردية صعب كتير تنضبط


طبعاً الولد عم يسمع هيك مسبات كتير اذا مو بالملعب بالمدرسة واذا مو بالمدرسة بالشارع

يعني مو شرط الواحد ما يسمع المسبات لحتى ما يصير يحكي

[رامي الوحداوي]

هي مشكلة بحد ذاتها

وصعب كتييير حلّها

[سعيد بيازيد]

أول شي بدنا كتير فت خبز ليصير عنا بسوريا جمهور متحضر يعني يكون بين الجمهور صبايا و ستات وكبار يعني متل الجمهور الأوربي و الياباني الكوري وحتى المصري بكأس أفريقيا بالقاهرة وكلنا بنعرف أنو في جنس لطيف ببلدنا بحبو الدوري وفرق الدوري بس ضروف الملاعب هي السبب أول شي ما في نظام بالدخول والخروج من الملعب ومافي كراسي ومافي دورات مياة ولاحتى مياة ومافي مطاعم وجبات سريعة وما في ومافي ومافي
بقى لحنا بدنا نوصل لكأس العالم أي لحنا شغلتنا نظل نتفرج عل العالم وملعبهم:roll:

[ميمو الرايق]

أول شي بدنا كتير فت خبز ليصير عنا بسوريا جمهور متحضر يعني يكون بين الجمهور صبايا و ستات وكبار يعني متل الجمهور الأوربي و الياباني الكوري وحتى المصري بكأس أفريقيا بالقاهرة وكلنا بنعرف أنو في جنس لطيف ببلدنا بحبو الدوري وفرق الدوري بس ضروف الملاعب هي السبب أول شي ما في نظام بالدخول والخروج من الملعب ومافي كراسي ومافي دورات مياة ولاحتى مياة ومافي مطاعم وجبات سريعة وما في ومافي ومافي
بقى لحنا بدنا نوصل لكأس العالم أي لحنا شغلتنا نظل نتفرج عل العالم وملعبهم:roll:
:grin: وأزمة ايران النووية و أزمة صواريخ كوريا الشمالية .......

[وحداوي كاسر]

كلامكم صح بس وين الرابطة وشو شغل اعضاء الرابطة ياشباب اذا لاعبنا لعب باصين غلط بالمباراة بيجيبو معدلو ومعدل كل عيلتو لو الرابطة بتنتشر بكل الملعب وبكترة وكل ما حاول واحد يشعلها بيهدوو وبيسكتو بأدب بظن انو معك معك الجمهور بيتعود على الأحتراموعلى محبة العيبة باسراء والضراء

[المتيم بالوحدة]

يعني الفكرة جيدة بس اذا كان الفريق سيأ وما في أداء والشرطة بتأفل من جهة ثاني شو بدو يتحمل الجمهور ليتحمل أخ..........:cry:

[عمار عبار]

كلامكم صح بس وين الرابطة وشو شغل اعضاء الرابطة ياشباب اذا لاعبنا لعب باصين غلط بالمباراة بيجيبو معدلو ومعدل كل عيلتو لو الرابطة بتنتشر بكل الملعب وبكترة وكل ما حاول واحد يشعلها بيهدوو وبيسكتو بأدب بظن انو معك معك الجمهور بيتعود على الأحتراموعلى محبة العيبة باسراء والضراء

ههههههههههه

قلتلي الرابطة لكان


قلبك طيب

[bmekhaled]

لك آآآآآآآآآخ آخ بس

بزمناتي حكيت كلمة بالهموضوع كذا واحد صار بدو يتنطوط و يتفزلك عليي

المشكلة مو بالمسبات الفردية
ولا لما تصير مشكلة متل غلط تحكيمي فادح
أو استفزاز من شي لاعب خاصة إذا كان لابس أحمر

المشكلة أنو قسم كبير و للأسف من جمهورنا و جمهور باقي الأندية طبعاً
جاية و حاطط ببالو المسبات الجماعية

يعني أنا مرة قلت هون أنو عيب على جمهورنا من قبل ما تبلش اللعبة و على أساس هاد التشجيع
نسمع منو .. قشر موز قشر موز ... و الكمالة بتعرفوها
طلعلي كذا واحد أنو هاد اللي شفته من جمهورنا و ما بيصير تحكي هالحكي و ليش ما حكيت عالتشجيع الحلو

سبحان الله
أخي انا ماني عامل حالي شريف مكة على قولة البعض ولا شي من هاد
و بعرف لساني بيفلت مني كتير بس كلمة و بتمرق
المشكلة الحقيقة بالمسبات الجماعية و للأسف أنا ما بشوف أي جهة عم تشتغل لتضبط هالشي

جمهورنا بدو شغل كتيييييير ليصير
و طالما أهم عامل اللي هو الادفع الذاتي غايب معناها لازم نشوف شغل مكثف من الرابطة
و كل واحد يبلش بحالو بأنو أضعف الإيمان ما ينساق ورا الهتاف الجماعي المسيء

[الكتلوني]

البركة كل جمهور سوريا بيسب وئفت على جمهور الوحدة يعني بدك تقنعني فريئك خسران واجا الحكم المساعد لغالك غول تسلل بأخر ديئة او حكم كب ضربت جزاء او لغا غول بدك الجمهور يسئفلو اي بأوربا مافي هاد الشي واذا بدك تابع الدوري الأيطالي والأسباني وباقي دوريات اوربا وبتلائي كلامي مظبوط

[SH@@MI]

البركة كل جمهور سوريا بيسب وئفت على جمهور الوحدة يعني بدك تقنعني فريئك خسران واجا الحكم المساعد لغالك غول تسلل بأخر ديئة او حكم كب ضربت جزاء او لغا غول بدك الجمهور يسئفلو اي بأوربا مافي هاد الشي واذا بدك تابع الدوري الأيطالي والأسباني وباقي دوريات اوربا وبتلائي كلامي مظبوط
ليش عنا الجمهور ما بسب غير اذا الحكم لغاله غول


اي طول اللعبة مسبات من أول عشر دئايئ

ومن قبل ما تبلش المباراة في هتافات فيها مسبات
متل
حاجة انتيكا حاجة انتيكا
وقشر موز قشر موز

[الموت القادم]

صعبة شوي بس انشا الله خير

[كمال بيطار]

ليش هي السنة اللي مضت مع كل النتائج اللي اقل من عادية ايمت كان في مسبات من الجمهور

في غير لعبة الجيش ؟

وباقي اللعب تخلص المباراة والجمهور يصفق اللفريق وهو طالع شو ما كانت النتيجة


ههههههههههه

قلتلي الرابطة لكان


قلبك طيب

والرابطة اللي تأسست السنة الماضية كانت رائعة جداً يا استاذ عمار عبار

بس حتى بالردود الجمهور عاطفي

يا كلو بأيد يا كلو بيعارض مع بعضو

[كمال بيطار]

ليش عنا الجمهور ما بسب غير اذا الحكم لغاله غول


اي طول اللعبة مسبات من أول عشر دئايئ

ومن قبل ما تبلش المباراة في هتافات فيها مسبات
متل
حاجة انتيكا حاجة انتيكا
وقشر موز قشر موز

الكل بيعرف من مين كانت تطلع هي الموشحات على زمان الرابطة القديمة

وهي السنة يمكن يمكن كنت بالملعب بكل اللعب انا وبالمنصة تحديداً

وما طلعت هي الكلمة ابداً مو هيك ؟

[ابو احمد]

ظاهرة مؤذية ومقززة ومنتشرة بكل الملاعب
ولا حل لها الا بالتربية المنزلية
وايضا هناك من يفتخر بالكفر وسب الذات الالهية والعياذ بالله
الحل صعب ولا اعتقد ان الرابطة تستطيع معالجة هذه الامور

[cr7]

والله معك حق أنا عمري16 وبابا بأغلب الأوقات ما بخليني روح عالملعب مشان ماتتفسد أخلاقي:cry

[خيرو]

هي الظاهرة بدها وقت لتنحسر من ملاعبنا ...
بس المهم انه نبلش بشي جدي لمنع هيك ظاهرة ...

[محمد سكر]

معك حق بس للأسف مابعتقد وجود حل لهل الموضوع ....
وللأسف على مايبدو هي القصة صارت مرتبطة بملاعب كرة القدم حتى العالمية منها لأنو شفنا أكثر من مرة وأثناء نقل مباريات أوربية ان كان دوري أو دوري أبطال اشارات غير رياضية وغير أخلاقية من الجماهير بحق اللاعبين وخصوصاً المميزين .

[كيوتك]

لازم حل هذا الجمهور جمهور الشام كلها يعني مو عادت جمهور الوحدة الشتائم وهي شغلة الربطة ياريت هي السنة تكون الرابطة احسن من السنين للي مضت وتكون اكثر موزعا بين الجمهور

[DIABO MAN]

عنا كل واحد محترم في مئابيلو تنين عالأقل أوسخ من الوسخة .... :crdr
فمشان هيك ما بظن انو بتئدر ادارة القوطرش تفوت عبيوت اللي بيجوا عالملعب وتربيون من اول وجديد

:)) بالضبط
وانشاء الله لو صاروا يلعبوا منيح ويفوزوا ماعاد تسمع شي:smile: